EDITORYAL - Pagpadakop sa mga barangay kapitan

Naigking karon ang mga opisyales sa mga barangay nunot sa kamandoan ni Pres. Duterte nga ipadakop sila sa mga polis kun dili nila masanta kining mga gitawag og “super spreader events.”

Kining super spreader events mao kining mga kalihokan sa mga tawo diha sa ilang barangay nga diin magtapoktapok ug mameligro na hinuon sa pagtakod-takod sa Covid-19 diha sa ilang barangay.

Apan nabalaka ang pipila ka opisyales kay basin og maabusohan ang maong kamandoan. Tipikal kaayo kini nga kabalaka alang sa mga politiko.

Kini tungod kay mahimo man gud nga gamiton kining mga ingon niini sa ilang mga kontra sa politika aron sila dauton o hasulon pinaagi sa pagpadakop kanila.

Dili ikalimod nga usahay ang mga polis nagamit gyud sa mga personal nga interes sa mga tawong may impluwensiya aron lutoson ug hasulon ang ilang mga kaatbang.

Sa teknolohiya karon bisan kinsa mahimong direktang mopaabot ngadto sa mga otoridad og mga videos o hulagway sa quarantine violations nga nanghitabo sa usa ka barangay nga dili na kinahanglang masayod ang ilang barangay officials.

Mao ning bahina ang buslot ug mao tingali nakapakulba sa mga barangay officials kay dako man gyud ang purohan nga sila imbestigahon ug may posibilidad pang masuspenso o mataktak sa serbisyo.

Aning kampanya sa gobiyerno batok sa pagkatap sa Covid-19, nag-una sa linya ang mga barangay nga kinahanglang maoy estriktong mopatuman sa mga health protocols sanglit diha man sa ilang dapit nanimuyo ang populasyon.

Apan sa nanglabay nga mga buwan sukad sa milabay’ng tuig ilabi na sa paglurang sa transmisyon sa Covid-19, nabantayan sab nga nilugak ang mga barangay sa ilang pagbantay.

Wala na ang 24/7 nga pagpatrolya diha sa ilang kadalanan ug sa mga suok nga bahin sa ilang barangay kung diin didto nahitabo kini pagtapuk-tapok sa mga tawo ug wala na mosunod sa social distancing ug wala na magsuot ang mga tawo og facemask subay sa minimum health protocols.

Apan mapakgang kining mga super spreader events ug malikay sa isyu ang mga kapitan kun ilang seryusohon ang pagpatuman sa mga health protocols sa ilang mga barangay.