Kasagaran kon maghisgot kita og milagro ang mosulod dayon sa atong hunahuna mao ang mga extraordinary nga mga panghitabo. Kini mao ang hinungdan kun nganong kun duna kitay madungog o makita nga kuno milagro dali dayon kitang motuo nga kini usa ka dakong milagro.
Apan kon buot hunahunaon dili kadto milagro kondili usa kadto ka dakong tinunto labina kun ang nagpasiugda niini mao kadtong dunay tinguha nga personal. Kining maong katuyoan maoy naghimo sa pulong milagro ingon nga barato.
Apan ang tinuod nga milagro mao man ang kinabuhi sa tawo. Ang kinabuhi puno man sa tanghaga. Dili kini mahimong sabton sa paagi nga simple ug yano lamang bisan pa man kun sa tinuod atong gikinahanglan nga magpuyo sa kinabuhing yano.
Apan ning panahon nato karon kita mismo maoy nihimo sa atong kinabuhi nga komplikado. Komplikado tungod kay daghan man nato ang nihimo og mga lakang nga makadaut nato mismo.
Ang makapahimo sa kinabuhi nga usa ka dakong milagro mao man ang paghimo nato nga makapausab sa kinabuhi dili lang nato kondili sa kinabuhi usab sa uban ug sa kalibotan sa kinatibuk-an. Mao kini ang milagro, mao kini ang nakapahimo sa kinabuhi nga usa ka dakong milagro.
Ang milagroso nga mga tawo mao kadtong mga tawo nga mohimo og maayo alang sa ubang mga tawo. Ang pagtabang sa uban mahinungdanon aron mahigmata sila nga sa kinabuhi mas makahuloganon ang paghimo og maayo kaysa ang paghimo og dautan.
Sa dihang gihimo ni Jesus nga bino ang tubig iyang gipahimug-atan nga bisan pa man sa kahagip-ot sa kinabuhi mahinungdanon sa gihapon ang pagsaulog niini. Ang matag kasaulogan makatabang man og dako uyamot sa atong pag-survive ning kalibutan nga puno sa daghang kapaitan.