Pagpamalandong sa Malangkubong Kaayohan

Tugoti ko nga akong hatagan og kahulogan kining maong pangalan. Agi’g pagsaulog pud sa among pangilin.

J kun Joy. Diha sa paghimo sa atong tagsatagsa ka trabaho si San Jose nagdapit man kanato nga kinahangang magmalipayon kita diha sa  bisan unsang atong pagpaningkamot.

Ang pagbuhat og bisan unsa diha sa kalipay moresulta man og nindot nga buhat. Ang JOY diha sa pagpamuhat mamahimong makahuloganon labina kun gihimo nato kini ingon nga pagpasidungog kang Jesus.

Labina kun himoon nato kining mapaambit sa uban kun Others ug labaw sa tanan mahimo nimong kahimanan ang pagpamuhat ingon nga self expression nimo (You) ingon nga tawo. Ang imong trabaho salamin lamang sa imong pagka ikaw.

Obedience si Jose ingon nga tawong matarong masinugtanon sa kabubut-on sa Dios diha sa iyang kinabuhi sa pagtuo.

Gihiklin niya ang iyang kaugalingong panginahanglan tungod sa iyang dakong gugma sa Dios.

Silence kun kahilom. Mao kini ang mahulagway nato kang San Jose. Tawo siyang hilom apan ang maong kahilom tabunok pud diay sa pamalandong.  Diha sa atong kinabuhi mahinungdanon kaayo ang paglihok diha sa kahilom. Ang mahilomong pagtrabaho, usa man pud ka matang sa pag-ampo.

Empowerment kun ang paghatag og gahum sa iyang anak nga si Jesus. Panday siya ug iyang gitudloan ang iyang anak sa maong matang sa panginabuhi. Sa ato pa, gihimong balaan ang pagtrabaho. Ug sanglit balaan man kini ang pagtrabaho usa man usab ka matang sa pag-ampo. Viva Jose! Viva!