EDITORYAL - Kurapsyon diha sa prisohan

Usa ka opisyal sa kapolisan sa Police Regional Office-7 ang mibutyag nga nakadawat kini og pagpanghulga sa kinabuhi hasta ang iyang pamilya pinaagi sa Facebook o social media.

Dili kini imposibleng mahitabo karong panahona tungod kay ang social media kumon na kaayong gigamit sa mga tawo.  Apan ang dili naka-kumon sa iyang kaso mao nga ang nanghulga matud pa niya usa ka inmate sa Cebu City Jail. Dili ba gidid-an man ang mga priso nga magtinil og mga gadgets diha sud sa prisohan?

Hinuon dili naman kini ikahibulong tungod kay sa nanglabay nga mga Operation Greyhounds nga gihimo sa Bureau of Jail Management and Penology ug sa kapolisan diha sa maong prisohan daghan nang nangasakmit nga mga gadgets pang-komunikasyon sama sa cellphones, tablets, laptops, ug uban pa.

Kining maong mga gadgets usab maoy gigamit sa mga druglords o drug personalities pagpadayon sa ilang negosyo sa ilegal nga drugas bisan naa sila sa prisohan.

Gani ang kapolisan nahibalo niini tungod kay matag duna silay madakpang sa mga operasyon batok ilegal nga drugas, ang ilang mga madakpan moangkon man nga igo ra silang nagtuman sa nagsugo kanila nga “contact” diha sa sud sa prisohan.

Bisan og naa na sila sa prisohan wala gihapoy hunong ilang ilegal nga negosyo sa gawas.

Kung tinuod kining pagpanghulga nga nadawat sa maong police official posibleng dunay laing tawo nga nigamit sa account sa maong inmate nga naa sa gawas o basin duna gyud kini gadget diha sa sulod.

Maayo tingaling imbestigahan og maayo kini, subling estriktuhon ang pag-inspeksyon sa mga dalaw ug supply sama sa pagkaon diha sa maong prisohan.

Kay kun ang gadgets gani makasulod, samot na ang mga gagmay’ng pakete sa ginadiling drugas ug uban pang mga kontrabando.

Usa sa gitumbok kaniadto nga rason mao ang kurapsyon, nga dunay pipila ka mga magbalantay ang nitabang sa pagpalusot aning mga kontrabando.

Kinahanglan tingaling kutawon nasab og balik ang maong institusyon aron salaon kinsa kining mga kakunsabo sa mga druglords sa sud.