Sa pagkatukod sa community pantry ni Ana Patricia Non sa Maginhawa St. sa Quezon City, nagplano kong magtukod sab duol sa amo sa Casili, Consolacion. Nagpatabang ko sa pipila ka organisasyon. Tungod sa ilang kabalaka kon mapatuman ba ang minimum health protocols, way nahitabo.
Dihang nanguhong na ang community pantries sa tanang bahin sa nasud, sila na say apurado nga idayon ang plano. Pero nahigot na sab sa mga kahadlok nga tingali og binuangan maong kinahanglan tingali nga bantayan o butangan og CCTV. Way kauyonan hangtod nga naapsan sa red-tagging.
* * *
Maong nangita ko og luna nga kapahimutangan sa community pantry. Nananghid ko sa tag-iya sa gamay’ng kan-anan nga maagian namong mga magbaktas gikan ug padung sa mga pinuy-anan, mga atanganan sa mga sakyanan ug mga trabahoan.
Salamat nga nakasabot siya sa kapuslanan ug nisugot dayon. Nangita ko og lamesa sa amo nga wa gamita, nagpapalit og lab-as nga mga utanon gikan sa merkado ug nigisi og pahina sa higante namong kalendaryo sa niaging tuig ug gipasuwatan sa akong asawa og, “Kuha Sa Gikinahanglan, Hatag Kon May Ikatabang.”
* * *
Sa di pa magduda si Lt. Gen. Antonio Parlade Jr., ang tigpamaba sa National Task Force to End Local Communist Armed Conflict (NTF ELCAC), wa koy komunikasyon uban nilang Non ug ubang tigpasiugda nga iyang gipasanginlan nga mga komunista nga nagtinguha pagtumba sa pamunoan ni Presidente Rodrigo Duterte.
Nisunod ko sa ilang gisugdan di tungod sa bisan unsang politikanhong kawsa. Igo lang nihimo sa kabos nakong tampo. Tuod man, wa abti og oras nahurot ang unang hugna sa mga utanon. Pero nagbaha nang nadawat nga mga hinabang.
* * *
Di kon ganahang moapil sa lalis kon tungod ba ni sa kapakyas ni Presidente Duterte sa pagtarung pagduma sa kampanya batok sa pandemya. O tungod ba sa kadaghan na sa gipanggutom kay padayong naapiki ang ilang mga panginabuhi tungod sa way klarong mga lagda sa gobyerno.
Pero uyon ko ni Atty. Ina Magpale, ang tagduma sa Kisaw! Sa SibyaTV, nga nisulbong ang community pantries kay ang katawhan sa kataposan, human sa kapin sa tuig nga kalibog, nakaangkon og mapuslanon nga ideya nga ilang mapatuman nga tinuod nga makatabang sa labing nagkinahanglan.
* * *