Kahinumdom ko sa gagmay pa, kon hapit nang piyesta, bunloton mi sa among maestro dayong sugod sa liga sa basketbol sa mga baryo.
“Kamao ka bang mo-dribol?,” maoy iyang pangutana sa unang mabira. Kon moyango, itud dayon sa korte ug ingnon, “Guard ka.”
Wa magkadimao ang among duwa. Nagkayamukat sab ang pikas nga team kay instant bunlot sab ang salida sa ilang coach.
Pero way kaso. Bisan may premyo ang kampeyon, kalingawan ra ang tuyo. Di sama karon. Nga ang kada lakang sa gobiyerno nagkahulogan og kinabuhi o kamatayon.
* * *
Way kalainan sa instant bunlot ang gihimo sa gabinete ni Presidente Rodrigo Duterte nga, bisan sa pangangkon nga mas andam ug mas kamao na, klarong mas nagkarakara atubangan sa pagsulbong sa bag-ong mga kaso nga mas daghan pa kay sa unang panghasi kapin sa tuig na ang nilabay.
Pila na ka buwan nga giapura nga hingusgan ang contact tracing ug palapdan ang swab testing, aron nga mabuwag dayon ang mga masakiton sa di pa makapanakod sa mas daghan, pero nagpalinguglingog lang ang Malakanyang. Hangtod sa niaging semana.
* * *
Dihang nireklamo si DILG Undersecretary Epimaco Densing, kinsa nagpatuo nga eksperto sa lugaw, nga wa na silay kuwarta nga ika-hire og dugang contact tracers, niboluntaryo si Labor Secretary Silvestre Bello, usa sa labing una nga taga Davao nga natudlo sa gabinete, nga may nahibilin pa siyang kuwarta.
Nipasalig si Bello sa pagkuha og 12,000 ka contact tracers gikan sa mga nawad-an og trabaho tungod sa lab-as nga lockdown sa Metro Manila ug kasilinganang mga probinsiya. Sulbad na untang problema pero, sama sa naandam sa pamunoan ni Presidente Rodrigo Duterte, may pipila ka bagahe:
* * *
Una, ang ma-hire ni Bello 24% ra 50,000 ka contact tracers nga giingon sa DILG nga maoy gikinahanglan aron masubay ang tanang close contacts sa kada positibo nga kaso;
Ikaduha, ang bag-ong contact tracers kinahanglan pa nga bansay-bansayon sa mga lungsod ug mga syudad nga nagbaha ang mga kaso;
Ikatulo, ug labing importante, wa pay detalye si Bello, nga gikaintapan sa iyang kapakyas pagtabang sa mga trabahante nga naapiki sa pandemya, kanus-a magsugod ang hiring ug training sa contact tracers.
* **