EDITORYAL - Way luna ang diskriminasyon

Kaning pandemiya sa Covid-19 nimugna sa nagkalain-laing pamaagi sa diskriminasyon, diin ang mga nabiktima mga health workers, mga tawong napositibo sa virus ug ang ilang pamilya. Sa wala pa kining mga bakuna dunay mga kompanyang apil sa gitugtang makabalik og pangabli human giluagan ang level sa quarantine protocols, nangita og medical certificates ug swab test results.

Samtang tuod og gikinahanglan kini aron pagsigurong walay sakit ang empleyado, dunay uban nga ang tan-aw ani nga polisiya usa ka diskriminasyon.

Dunay mga tawong mahadlok magpa-swab test tungod sa kabalakang kung positibo sila sa virus, ma-lockdown ang ilang balay ug maapektahan ang ilang panginabuhi. Karong duna nay bakuna ug gisugdan na sa gobiyerno ang vaccine rollout duna na say posibilidad nga kaning ubang kompanya mangita na sab sa ilang mga empleyado og vaccine certificate.

Kay sayo pa man gikan nasugdan ang pagpamakuna sa gobiyerno dili pa tanang tawo nabakunahan na hasta sab ang mga trabahante.

Usa sab sa problema adunay mga nikatap nga mga posts sa social media bahin sa mga “adverse effects” o negatibong epekto sa bakuna ngadto sa pipila ka mga nabakunahan na didto sa Uropa, nakadugang kini sa pagduhaduha sa mga tawo magpabakuna.

Mao nga dili makiangayon kung gamitong rason sa mga kompanya nga did-an ang ilang mga empleyado nga makasulod sa trabaho kung wala pa sila nakapabakuna. Usa kini ka matang sa diskriminasyon.

Tinuod nga kinahanglang maprotektahan ang mga mamumuo gikan sa maong makatakod nga sakit, apan kung nagdali man kining mga kompanyaha mas maayong sila nalang mismo mamalit og bakuna para sa ilang mga empleyado. Dili sab makiangayon nga pabayran sa mga empleyado ang bakuna kontra Covid-19.

Kung walay kwarta ang kompanya ikapalit niini, mas maayong moduol sila mga hingtungdang ahensiya sama sa Department of Health o lokal nga kagamhanan aron libreng mapabakunahan ang ilang mga kawani.

Karong panahona nga dunay pandemiya gikinahanglan ang kooperasyon sa publiko ug sa gobiyerno.

Mao usab kini maoy angay himuon sa mga kompanya ngadto sa ilang mga kawani ug sa gobiyerno kung gusto nilang molahutay sa pagpamatigayon.