Nganong mag PDA man gyud?

Nakaani og nagkadaiyang reaksyon ang paandar karon sa nasudnong kapolisan kalabot sa pagdili sa public display of affection kon PDA sa manag-uyab ug bisan kadtong magtiayon o manag-live-in basta tanan mag-PDA badlongon gyud sa mga otoridad. Ang naasoy’ng direktiba gikan sa national headquarter sa Philippine National Police usa ka pamaagi aron mapugngan ang pagburot pa sa coronavirus nga mibalik na usab og sulbong.

Daghan ang misaka ang kilay sa naasoy’ng lakang sa kapolisan kay dili man kuno practical sanglit inig uli sa balay ilabi na kadtong mga magtiayon mag-uban ug magdulog man.

Ang giingong public display sa pagbati naglakip sa panag-agbayay sa manag-partner, ginunitay sa kamot o holding hands, ug ang panaghalok atubangan sa publiko. Ang holding hands ug agbay sa abaga depende seguro kay naay panahon sama sa pagpanglakaw sa magtiayon o manag-uyab naay higayon nga gikinahanglan nga gunitan ang kamot o alalayan ilabi na kong molabang sa pedestrian lane o karsada aron seguradong safe nga dili maligsan.

Apan ang panaghalok ilabi na kong manuroy sa plaza bisan ismak-ismak lang sa ngabil aw dili sad gyud maayo kay mura'g hilas ra man labi na kong dunay mga bata nga makakita. Adto nalang sa pribadong lugar nila kana himoon baha og mangalangkat ang ilang mga ngabil. Ato kunong suwayan sa pagsawom ang katarongan sa PNP leadership nganong ila kining gihimo. Una sa holding hands panahon sa pagpanglakaw naa man gyuy time nga maghikaphikap sa mga butang ang asawa o bana, sama sa mga gipamalit nga butang diin bisan unsa nalang ang pamaliton.

Ang mahitabo nga makakupot kini og butang nga naay virus ug mabalhin ang virus sa kamot sa iyang partner aw segurado gyud nga matakdan sa dalan pa lang diin sila mag holding hands, unya dili mabantayan nga mokolikot ang kamot sa ilong ug dunggan aw nakasulod na si COVID-19. Daghan ang mahitabo o makuptan samtang naglakaw lakaw sa publikong dapit, moingon ang uban nga magdulog ra man inig uli. Tinuod man na pero sa dili pa magdulog mangaligo una aron presko, humot ug seguradong limpyo, laina kaha kong moderetso nalang og dulog nga walay panglimpyo sa lawas.

Naa ra bay batasan sa uban nga kuhaon ang kamot sa uyab dayon hagkanhagkan ug tungod sa nag-uros-uros nga gibati malimtan na nga ang kamot nga gihagkan nakagunit diay to og butang nga naay kagaw. Kong ang pagpugong sa expression sa pagbati karong panahona ang makatabang sa pagpugong sa COVID-19 transmission dili man seguro bug-at kining buhaton kay alang ra man usab kini sa kaayohan natong tanan.