Rev. Matag tawo nanginahanglan gyud og kaayohan

Kini ang hinungdan kun nganong daghang mga tawo karong panahona ang dali ra gyud patuohon nga dunay milagro labina kun maghisgot kita og pagpakita sa mga santos, sa Birhen Maria labina gyud sa atong Ginoo. Nagkadaiyang mga titulo ang gihatag hangtod nga sa kaulahian nahimo naman lang kining usa ka kulto. Kulto nga gawas nahimong abli sa mga demonic influence pwede pud nga mahimo kining sukaranan sa daghanan pang pagpangilad ug pagpanapi.

Lisud rong panahona sa tinuod lang ug daghan usab ang nahimong mga mapahimuslanon. Ug kun gihimo kang mahiagom sa ilang kadautan ug kalampingasan kana tungod kay sinugdanan pa lang daan, dautan na ang ilang tinguha. Mahimong gamiton ang mga panghitabong giisip nga metaphysical aron sa ingon mamahimong ma-justify ang ilang gilaraw nga mga hitabo. Kalisod. Sa tinutokan pa lang daan masayran mo na ang tinipigan nilang kapintas. Daw mga bitin nga nangandam lamang sa tukmang higayon sa pagpanukob.

Ning panahon karon iya iya na lamang og diskarte ang matag tawo. kini sa mosunod nga mga rason:

1. Una, ang tinguha nga mamahimong maka-survive sa dakong kalisdanan.

2.  Ikaduha, aron bisan pa man sa kakuyaw nga mapapas gikan sa listahan sa mga tawong mahinungdanon, mangita gyud og paagi aron mamahimong mahinungdanon sa gihapon.

3. Ikatulo, gihimo nila ni tungod kay kita nila ang possible nga ginansiya kun ugaling ubay ubay na ang mopaak sa maong paon.

4. Ikaupat, buot nilang kontrolon ang kinabuhi sa ubang mga tawo mao nga nahimong mogawas nga sila ra kunohay ang linamdagan sa Espiritu Santo.

5. Ikalima, nisangpit tuod sila sa Dios apan ang Dios ila lamang gihimong kabahin sa ilang mga plano ug kabubut-on dili kay gisunod nila ang kabubut-on sa Dios.

Mao nga kita kinahanglang magmatngon kay ang yawa sama sa leon nangita og tukbonon. Ato siyang pakigbatokan ginamit ang pagtuo nga nagasukad sa rason. Tinuod nga ang matag tawo nagkinahanglan og kaayohan apan wala kini magpasabot nga atong sakyan ang ilang mga kahuyangan makuha lang nato ang atong kinaugalingong panginabuhian.