Sa kataposan naabot na gyud ang dugay nga gipaabot, ang bakuna batok sa COVID-19 nga naghamok sa katawhan sulod na sa usa ka tuig.
Apan kong unsa ka stress ang mga tawo tungod sa kalisang sa virus, na-stress man gihapon sila karon kay nahadlok naman sad sa bakuna ilabi na nga gikan sa China ang Sinovac vaccine.
Apil ang mga medical world sa atong nasud ang mibati og kahadlok nga maoy hinungdan nga ang uban kanila dili magpatusok sa naasoy’ng bakuna.
Nakapasamot kini sa kahadlok sa mga yanong tawo kay nahadlok man gani ang ubang mga doktor ug nurse unsa pa kaha kadtong mga tawo nga walay background sa medisina.
Tungod kay unang higayonan man, dili malikayan nga mobati gyud og sama niini kay kinabuhi gud ang nakataya niini.
Apan angayan hinumduman sa katawhan nga kini alang sa kaluwasan sa kinabuhi gikan sa peligro mugna sa virus.
Busa dili nato sayangon ang kahigayonan nga mapanalipdan ang atong kinabuhi ug ang kinabuhi sa atong pamilya pinaagi sa pagpabakuna. Mao ra kini ang sulbad sa dugay na natong pag-antos aron makabalik na sa naandan natong kinabuhi nga libre sa kabalaka ug kahadlok.
Dili man garantiya nga dili na kita mataptan sa virus apan makahatag kini og proteksiyon nga dili mograbe kay kadtong severe case ra man ang mamatay.
Matud sa mga health expert nga sama sa bulawan ka bililhon ang bakuna nga gihukad ngadto sa mga tawo. Giuna ang mga naa sa priority list diin nag-una ang mga health frontliners kay sila man ang naa sa unahan sa giyera batok COVID-19.
Sus kong pwede pa lang mopresentar nga magpabakuna mag-una una gyud ko pero wala man ko maapil sa priority busa maghuwat nalang kanus-a moabot ang kahigayonan.
Naa man mga epekto apan sama sa ubang bakuna natural kini nga pamation sa mga mabakunahan, ug wala magpasabot nga makadaut na kini.
Nagsugod naman gyud ang pagpamakuna sa nasud apil na ang Sugbo, naa bay nagrabehan o namatay? Wala man seguro.
Ang uban magpili nga kadtong gikan sa Amerika o bakuna basta dili gikan sa China. Hala paabota kong makapalit pa ba ang nasud anang gipangandoy nga brand. Ug kon makakuha man seguro pero dugay pa. Hinumdumi nga oras ang atong kontra, ayaw na paabota nga maapsan ka sa virus nga wala pa kay pang alkontra nga bakuna. Mas maayo nga naa nay panagang ang lawas daan kong maabtan sa virus kay mao na kini ang moaway sa COVID-19 aron malikay kita sa mas grabe nga sitwasyon.