Daghan kaayo nato ang mahiligon kaayo og mga horror movies dili ba?
Gani daghan nato ang mogasto gyud aron dunay kasinatian sa mga horror nga hilisgotan. Ang resulta mao nga tinuod gayud ang panultihon nga kita mibayad aron lang mosiyagit.
Dautan ba gyud kaha ni? O bunga lang kini sa atong imahinasyon? Anaa ba gyuy demonyo? O impakto? Sa mga mata sa pagtuo anaa.
Apan sa mata sa siyensiya ang tanan representation lamang sa bisan unsa nga anaa sa atong hunahuna paagi kini aron mamahimong mas makalingaw ang atong kaugalingong panaw.
Dili dautan ang mahadlok. Gani sa karaang panahon mga liboan na ka mga siglo ang nilabay ang atong mga katiguwangan ang bation gyud og kalisang sa ilang palibot nga tungod niini naantigo silang migamit og mga mekanismo sa pagpanalipod sa ilang kaugalingon.
Apil na niini ang paghimo og mga ritwal agig pagsumpo sa presensiya sa mga dautang mga espiritu. Ingon ini ang ilang pamaagi dili tungod lamang sa mga dautang espiritu ug mga maligno kondili aron sila mabuhi ug mo-survive sa presensiya sa mga makuyaw nga mga elemento sa ilang palibot apil na niini ang mga hayop nga manunukob.
Sa ato pa ang kalisang usa ka kahimanan sa pagpanalipod sa kaugalingon gikan sa bisan unsang makadaut ug makapatay niini.
Matag usa nato dunay gikalisangan. Kun padayon kitang dili maantigong moatubang niini padayon kitang uromon niini.
Wala ko moingon nga nga kinahanglang isog kita sa tanang panahon.
Ang kalisang makatabang kanato aron kita maluwas gikan sa bisan unsa nga kanato makadaut ug makalaglag. Sama sa sala kun asa kita dapita huyang, dili maayo nga magpatuga aron ingnon nga isog sa mga mata sa kadaghanan.