Maayo baya gyud ang mamahimong spontaneous. Apan dili sa tanang panahon nga himoong daw mahilansang na lang kita sa naandan. Kinahanglang mohimo kita og mga lakang aron sa ingon mamahimong hapsay ug malampuson ang matag panlimbasog. Tinuod man tuod ang panultihon nga two heads are better than one kana kun managsama mo og heads.
Sa laktod, kun managsama ba ang inyong panghunahuna. Kun nahimong dunay leveling off sa matag usa kaninyo. Gani dunay panultihon nga nagkanayon: “There will be first among equals!” Freak of Nature nga sa usa ka organisasyon daghan ang pangulo. Duna ra gyuy usa ka pangulo diin buhat niya ang pagpasayon aron molihok ang matag usa sibo sa plano. Dili lang ni mahitungod lang sa brainstorming kay kasagaran sa brainstorming kutob ra gyud sa brain storming. Walay concrete action. Tuyo niini nga mamahimong sayon lamang ang tanan.
Sa laing bahin, mahinungdanon kaayo ang pagbutang sa mga husto ug tukmang mga tawo sa husto ug tukmang posisyon. Sa ato pa, mga tawo nasayod sa ilang mga gimbuhaton. Mga tawo nga dunay kabangkaagan dili lang tong mga tawo nga giisip natong suod. Kay usahay ang giisip natong suod mao man hinuon ang mounay kanato. Mahinungdanon kaayo ang pagduda aron sa ingon dili kita magdali dali sa atong mga pagahimoon.
Sa laing bahin, katag ang palibot kun daw katag ang matag tawo. Mao nga ang mga tawo nga dili kaayo manlimbasog aron magmapuslanon kinahanglang gyud nga paphaon kay ang ilang presensiya nagdala man hinuon og tigaw sa damgo nga atong gibugtaw. Dili lang kini mahitungod lamang sa ginansiya kondili mahitungod usab kini sa paagi nga mamahimo kitang magpuyo sa paagi nga dunay bili ug mabungahon.
Unsaon naman lang ang mga kabus? Ang mga kabus tudloan aron mamahimong makaamgo sa bili sa paningkamot ug dili lang ang pagpunay og pakiluoy sa mga tawong nagtuo nga sila maayo kay sila nakahatag ug nakapaambit sa ilang sobra.
Mao nga atong himoon ang pulong LIKAY.
Lihok sa paagi nga dili pud molusno sa imong kahimsog. Walay luna sa kalibutan ang tapulan.
Igoa ang imong hunahuna sa imong maabot aron dili magsakit imong dughan kun ugaling dili nimo makab-ot.
Kahibalo mahinungdanon kaayo busa pagtuon ug tugoti ang imong kasinatian nga maoy magtudlo kanimo sa kinaandman.
Ampo nga buligan ka sa kahitas-an. Yanong kinabuhi ang sekreto aron mamahimong malipayon ka. Yano man tuod apan malampuson.