Unta ang Pebrero 11 daghang mga tawo kay lagi Fiesta sa Birhen sa Lourdes ug gawas nga fiesta gisaulog usab nato ang World Day of the Sick. Didto sa France daghang mga tawo gyud unta kun wala pa ang pandemic.
Apan gumikan sa pandemic nahimong daw limitado na lang gyud ang tanan.
Apan dili ang grasya ug kaluoy sa Dios, sanglit unlimited man kini. Unlimited tungod kay ang maong kasinatian, kasinatian man sa kinabuhi ug makahatag pa gyud og kinabuhi.
Sa dihang gibasa ko ang ebanghelyo karong adlawa nga naghisgot sa babaye nga taga Syria nga mahangyoon kaayo tawon kang Jesus nga ayohon lang ang iyang anak.
Ingon ana kadako ang iyang pagtuo ug pagsalig nga kining maong Judio makaayo sa balatian sa iyang anak nga gisakit sa yawa niadtong mga higayona.
Bisan pa man kun nakadawat siya sa angga nga iro apan padayon siyang nangaliyupo ug nipadayag sa iyang pagtuo.
Hinungdan nga ang atong Ginoo dinhi sa ebanghelyo ang niayo gyud sa maong balatian from a distance. Ang maong pagtuo nakaayo.
Si Jesus ang supreme healer alang kanatong dunay gihambing mga balatian.
Dili lang lawasnon kondili usab espirituhanon. Bisan pa man sa mga higayon nga daugon kita sa atong mga kahuyangan apan padayong nakakita ang Ginoo sa atong bili ingon nga tawo ug ingon nga iyang anak mao nga dili kita angayang mahadlok.
Mahimong talikdan kita sa tanan apan sa Dios dili gyud kita biyaan. Ingon ana kita ka bililhon sa iyang mga mata.
Ang atong balatian bisan pa man kun sakit palandungon apan nakapahamtong usab sa paagi nga gilantaw nato ang kalibutan sa kalambigitan. Ang tanan diay dunay kinutoban busa dili kita angayang magpagarbo niini.