Bisan og pinahan pa nimo

PEBRERO 14, 2021: Ikaunom nga

 Domingo sulod sa tuig (Valentine's Day)

Mga Pagbasa:    Lev. 13;1-2. 44-46/Sal. 32/2 Cor. 10;31-11;1/Mk. 1; 40-45

Mao kini ang nahitabo sa sanlahon sa dihang naayo siya. Giingnan siya ni Jesus nga magpahiling siya sa pari ug maghalad sa mga halad agi’g pagmatuod nga naayo na siya. Apan ang iyang gihimo mao man hinuon ang pagsangyaw nga giayo siya ni Jesus.

Lisod ning mamahimong sanlahon kaniadto. Kini tungod kay ang usa ka tawo nga mataptan sa sanla ang makasinati ning mosunod:

1.  Social Isolation. Anaa na diay ang social distancing kaniadto. Magdala dala sila og kampanilya uban ang pagsinggit nga: MAHUGAW AKO! Ang si bisan kinsa nga makadungog ug makakita ang magpalayo man gyud dayon.

2.  Indifference to pain. Gumikan sa sanla ang tawo dili na bation og sakit. Nahimong numb ang iyang pamati nga tungod niini dili siya makabantay nga siya mamahimong masamad, mapaso, mao nga kasagaran sa mga sanlahon dunay mga higayon nga sila ma deform. Tungod kay halayo na alang kanila ang physical nga sakit.

3.  Gikalisangan kay basin makatakod mao nga anaa ang starvation of touch. Mao kini ang ilang nasinati. Lisud gayud.

Apan si Jesus mihikap kaniya. Kuyog sa maong paghikap mao ang pagbalik kaniya ngadto sa naandang gutay sa tawhanong kalambigitan. Kining maong kasinatian maoy naghimo kaniya nga mapasalamaton ug malipayon nga bisan pa man kun siya gipinahan ug gidid-an sa pagpanugilon siya ang wala makapugong sa iyang kaugalingon.

Iyang gibandilyo ang tanan ngadto sa kinabag-an nga tungod niini si Jesus dili na hinuon makapasaya saya.  Ning pagsaulog usab nato sa Valentine’s Day unta anaa ang tinud-anay nga kahulogan sa gugma nga atong ipakita diha sa atong pagpakabana. Happy Valentine’s Day sa tanan!