EDITORYAL - Bakuna naghatag paglaum

Karong malantawan na sa unahan ang bakuna batok sa Covid-19, unsa may sunod nga angayang buhaton?  Ang balita bahin sa pag-abot na sa bakuna dinhi sa Sugbo (bisan dry-run palang) mikatap sama sa kalayo sa kakugonan.

Dali kaayong nakaabot ang balita sa kinasuokang mga bahin sa kabarangayan. Bisan tuod og simulation exercise palang kadtong nahitabo sa Mactan Cebu International Airport, nakapabuhi kini sa dugo sa mga tawo.

Unsa may implikasyon niini sa katawhang Pilipinhon? Naghatag kini og paglaum para sa tanan aron makabangon gikan niining kadaut nga gibilin sa pandemiya. 

Kahinumdoman nga daghang mga Pilipino ang nawad-an og trabaho tungod sa Covid-19, gawas sa kinabuhing nangawala, milyones o bilyones ka pesos nga kantidad sa mga oportunidad sa patigayon ang nawala.

Tungod sa pandemiya daghan ang nawad-an og paglaum ug kasigurohan kun makapadayon pa sila sa unahan, ilabi na para niadtong mga nawad-an og trabaho tungod niini. Samtang daghan ang nagtan-aw sa 2021 nga maoy pagatawgong “year of recovery” nunot sa pagsugod na paggawas sa bakuna batok sa Covid-19, dili kini ingon niana lang kasayon.

Ang recovery kinahanglang trabahoon sa tanan, dili kini makab-ot niadtong mga magmika lang ug kadtong tapolan nga magpaabot lang maoy duolon sa grasya.

Kinahanglang molihok ang nasudnong gobiyerno, lokal nga mga kagamhanan ug mismo sa mga tawo.

Ang gobiyerno kinahanglang siguradohong magpadayon ang pagpamakuna ug pagpahigayon og swab testing, contact tracing ug pag-atiman sa mga mataptan ilabi niadtong wala pa mabakunahi o sa mga lugar nga wala pa maabot sa bakuna.

Mao sab sa mga lokal nga kagamhanan ug sa publiko. Dili makarekober ang nasud kung walay kooperasyon sa tanan gikan sa sinugdanan hangtud sa makompleto kining pagpamakuna.

Human sa recovery, angay nga pangandaman nasab ang posibleng lain na usab nga pandemiya nga moigo kay posibleng mas grabe pa unya ang epekto niini sa tawo ug sa kanasuran.