Kinsa ang gamhanan

Wala na tugoti sa kaparian sa Basilica Menore del Sto. Niño ang mga deboto sa pagtambong sa Novena Mass alang sa fiesta ni Sr. Sto. Niño. Ang maong hukom ilang nakab-ot human nila gikonsederar ang siguridad sa mga motambong sa misa batok sa COVID19.

Human man gud sa Pasko ug bagong tuig, nisaka ang gidaghanon sa kaso sa COVID-19 dinhi sa dakbayan sa Sugbo. Kini ang hinungdan nga ang kaparian sa basilica nabalaka nga mosulbong pag-ayo ang kaso sa COVID-19 kon ilang ipadayon ang misa nga tambongan sa daghang mga deboto.

Apan nasuta sa Emergency Operation Center ug Department of Health-7 nga ang pagsulbong sa kaso sa COVID-19 dili tungod sa kadaghan sa mga tawo nga mitambong sa Misa de Gallo. Gani sa contact tracing nga ilang gihimo, ilang nasayran nga usa lang sa mga mitambong sa Misa de Gallo ang natakdan sa COVID 19.

Unsa may buot ipasabot niini? Maingon ba nato nga ang mga nanambong sa Misa de Gallo gipanalipdan sa Ginoo kay sa ilang kadaghan usa ra man nila ang natakdan sa COVID-19?

Wala ba gikonsiderar sa kaparian sa basilica ang nasuta sa EOC ug DOH-7 sa ilang paghukom nga dili na patambongan sa mga deboto ang Novena Mass niini?

Kun wala man nila kini gikonsiderar, unsa may buot ipasabot sa kaparian sa basilica?  Buot ba nilang ipasabot nga wala sila motuo o kulang sila sa pagtuo sa gahum ni Sr. Sto. Niño? Buot bang ipasabot sa mga pari nga mas gamhanan pa ni Sr. Santo Niño ang COVID-19?

Kun ang kaparian sa basilica mituo pa sa gahum ni Sr. Santo Niño ug ang maong pagtuo hugot, siguro dili sila makahukom sa pagdili sa mga deboto nga pagtambong sa mga Novena Mass nga gipahinungod alang sa kapistahan ni Sr. Santo Niño tungod kay seguro sila nga ang mga deboto panalipdan sa Balaang Bata.