Naproblema ang mga choreographers sa mga contingents nga mosalmot unta sa Sinulog karong tuiga unsaon pagbayad ang ilang dakong utang human gikanselar sa Sinulog Foundation Inc. (SFI) ang tanang kalihukan sa Sinulog nunot sa sugyot sa Regional Inter-Agency Task Force on the Management of Emerging Infectious Disease (RIATF-MEID).
Ilang hangyo sa dakbayan sa Sugbo, hatagan sila og ayuda aron ibayad sa giutang nila nga mga materyales paghimo sa ilang mga props. Sagad sa mga contingents 80 porsiento na nga nahuman sa ilang mga props alang unta sa Sinulog Festival karong Domingo.
Apan way pasundayag nga mahitabo, bisan virtual, tungod kay supak ang RIATF sa pagpahigayon niini. Matud sa mga sakop sa regional task force nga dilikado nga mahitabo ang tinakdanay sa COVID kun tugotan nga ipahigayon ang Sinulog bisan pa og way mga tawo nga tugotan nga manan-aw.
Ang gisaligan sa mga contingents nga ibayad sa ilang utang mao ang subsidy nga ilang madawat gikan sa dakbayan pinaagi sa SFI. Naandan na sa dakbayan ang paghatag og ayuda sa mga contingents.
Basi sa nanlabay nga katuigan ang dakbayan mihatag og hangtud sa P400 mil nga ayuda sa matag contingents. Karong tuiga gipaabot unta nga padak-an ang maong kantidad hangtud sa tunga sa milyon ka pisos.
Apan unsaon paghatag sa dakbayan ang maong ayuda kun way Sinulog nga mahitabo? Unsay himoong rason sa dakbayan ngadto sa Commission on Audit aron makalusot ang maong ayuda? Si Mayor Edgardo Labella miingon iyang pakigtagboan ang tresurero sa dakbayan ug ang mga sakop sa local finance committee aron tun-an unsaon nila pagsulbad ang problema.
Dili sab mabasol ang mga contingents kun maningil og ayuda gikan sa dakbayan tungod kay wala sila masugamak sa maong problema og wala sila imbitaha nga mosalmot sa Sinulog. Ang mga contingents gidapit sa SFI nga mosalmot sa Sinulog busa nagtuo silang wala nay babag sa pagpahigayon niini.
Kun dunay angayang basolon sa hitabo, way lain kun dili ang kadagkoan sa SFI pinangulohan ni Vice Mayor Michael Rama. Angayang nangayo sila daan og pagtugot sa IATF sa wala pa sugdi ang preparasyon aron unta malikayan nga mahinayak ang mga contingents.
Ang nahitabo mao, nangimbitar silang daan sa mga contingents bisan wala pay klaro tugotan ba sila sa IATF. Karon nga nabulilyaso, personal nga kwarta ni Rama maoy angayang ihinabang sa mga contingents og dili pundo sa gobiyerno.