Inila nga magpapatigayon sa Sugbo gihagad sa iyang mga higala nga mamalit sila og bakuna batok sa COVID-19 nga gikatahong ilegal na nga gipamaligya sa Metro Manila. Iyang nahibaw-an nga ang bakuna gi-presyohan sa black market og P30,000 matag dose.
Gawas lang sa pasalig sa mga nagpayuhot sa kakasaligan sa ilang bakuna, way paagi ang ilang mga kustomer sa pagsusi sa katinuod sa mga produkto, unsa kaluwas alang sa mga pasyente ug unsa ka-epektibo batok sa SARS-CoV-2, ang kagaw nga mosangpot sa Covid-19.
* * *
Kay gahapon pa man makahatag og pagtugot sa bakuna sa Pfizer ug BioNTech ang Britanya, ang labing una nga nasud sa tibuok kalibotan nga nihatag og lisensiya sa bakuna batok sa pandemya, ug kay sa Disyembre 10 pa man tukion sa Estados Unidos ang aplikasyon sa Pfizer ug BioNTech ug sa Disyembre 17 ang aplikasyon sa Moderna, mahimong lahi ning bakuna ang gipanghagad na sa kaulohan.
Nangagpas ang mga gibaligyaan nga mahimong gikan sa China o Russia nga pulos nihatag nang daan og pagtugot sa ilang mga bakuna bisan wa pa mahingpit ang Phase 3 sa clinical trials.
* * *
Ang mga nagpahimus sa dinaliang panginahanglan sa bakuna mahimong kabahin sa mga sindikato nga gipasidaan sa Interpol (International Criminal Police Organization) nga mamaligya og peke nga mga bakuna o mangawat sa tinuod nga mga bakuna.
Gipaandam sa Interpol ang 194 ka sakop nga mga nasud, nga naglakip sa Pilipinas, sa organisado nga mga kriminal nga molusad og lapad nga mga sabotahe sa mga bakuna sa pagsangyaw og pekeng mga produkto pinaagi sa websites o mangilog gyod sa mga kargamento sa tinuod nga mga bakuna.
* * *
Gipanid-an sa Interpol ang kapin sa 3,000 ka online pharmaceuticals websites nga gidudahan nga mamaligya sa peke nga mga bakuna. Kapin sa 1,700 nila naglakip sa phishing o spamming malware, nga mangawat sa mahinungdanong kasayuran sama sa usernames, passwords ug mga detalye sa credit cards.
Nitambag ang mga eksperto nga samtang magpaabot sa tinuod nga mga bakuna, angay nga padayong motuman sa napamatud-an nga epektibo nga mga lagda batok sa tinakdanay sa COVID-19 sama sa pagsul-ob og face masks ug pagsige og panghunaw.
* * *