Unsay imong ikapanghambog?

Dili ikalimod nga usahay kitang mga tawo mapasigarbohon gyud kaayo labina kun maghisgot kita og achievements, butang ingon man accomplishments bisan asa nga natad ug bisan asa nga kahimtang. Daw sa nakontento ko nga nakakita nga nahuman ra gyud ang hinagoan nga balay alampoanan ug gani giingon man nga tingali akong tawag ang mag-ayo sa mga guba aron kini makabaton og laing hulagway.

Apan alang kanako, kining tanan nga mga compliments dili man pagaisipon nga sukaranan sa imong pagka ikaw. Mahimong sila bunga lamang pud sa imong kalaay ug sa imong personal nga issue nga giatubang.

Human nako matan-aw ang documentary nga Deliver Us from Evil nga naghisgot kalabot sa sexual misconduct sa mga tawo nga anaa sa clerical nga kahimtang. Sa pagpaminaw pa lang nako daan sa mga biktima nga nisaysay sa ilang ilang mga kaagi ug traumatic experiences daw malisud alang nako ang pagtulon sa maong mga kamatuoran. Dili tungod kay ako maayo kay kanila kondili tungod kay basin luyo sa akong hunahuna ug pagbati may natampo sab ko sa maong sistema. Ang sistema sa kahilom aron sa pagtago sa matag usa kay lagi kabahin man sila sa akong kinabuhi ug sa tingalog pa mga kabaro man sila.

Apan kining mga butanga alang nako dili lang karon nga isyu. Nahimo naman kining isyu kaniadto pa. nahimo naman kining isyu bisan pa kun linghod pa ang panuigon sa simbahan. Apan wala kini magpasabot nga kay isyu man kini sa kakaraanan ato na lang sab paundayonan ang tanan tungod kay mao namay naandan?

Nagkadaiya ang akong gibati sa dihang nagtan-aw ko sa maong documentary. Kini naglangkob ning mosunod:

1.       Ning panahon sa pandemiya imbis pangitaan og paagi aron mas maumol ang positive outlook ning maka-depress nga hitabo sa pandemiya. Daw mas gipun-an pa ang depresyon pinaagi sa pagpaubos sa self-esteem kanila nga nalambigit directly o indirectly ning maong isyu.

2.       Ang maong pasundayag nagpakita lamang nga ang simbahan ingon nga institusyon masalaypon man usab. Ang iyang pagkamasalaypon mas konkretong nakita dili lang sa mga isyung sexual kondili usab sa mga isyu sama sa politika ingon man ekonomiya.

3.       Ang maong pasundayag nagpahinumdom kanako nga malisud gyud diay ang pagpuyo sa kinabuhing balaan. Tungason gyud kaayo kini unsaon na lamang.

Ang hagit ni Papa Francisco mao man ang personal ug collective conversion. Personal tungod kay usa man kini ka personal issue nga milambigit og mga personalidad nga dunay personal nga problemang sexual. Collective tungod kay kinahanglang dunay usbon sa sistema kalabot niini.

Dili lang ni mahitungod sa pagpasaylo o pulong sa Dios kondili mahitungod kini sa pagpakita sa makiangayong hukom inubanan ang kaluoy sa biktima nga naguba ang ugma sa naghimo sa salaod nga nahimong binilanggo usab sa iyang walay hinungdang kahilig. Wala koy laing ikapanghambog gawas sa akong kahuyangon ug kamasalaypon.