Hangtud karon, mora og lisod pa gayud nga katuohan ang kalit nga pagpanaw ngadto sa lain nga kalibotan ni Representante Raul del Mar, ang kongresista sa amihanan nga distrito niining dakbayan sa Sugbo.
Tungod sa iyang dakong nahimo dili lamang sa iyang distrito o sa dakbayan kondili sa entiro Sugbo, hilabihan ka daghan ang nanghinayang sa iyang pagtaliwan sa nangaging mga adlaw sa edad nga 79-anyos.
Alang sa iyang gatusan ka libo ka mga konstituwenti, lisod nga mawala sa ilang panumdoman si Del Mar. Kini gumikan sa iyang dakong nabuhat sa ilang distrito diin siya nagsilbi sulod sa subra sa 30 ka tuig.
Dili makwestiyon ang iyang pagserbisyo sa north district. Gani, tungod sa daghang proyekto nga iyang gibubo, padayon siyang humot sa mga botante kinsa kanunay nga mobutang kaniya sa Kongreso matag piniliay.
Sa iyang hataas nga katuigan pagpanerbisyo sa mga Sugboanon, usa si Kongresista Del Mar sa mga Sugboanong lider nga angay nato nga ipasigarbo.
Kini gumikan sa iyang tinud-anay nga pagpangatungdanan.
Ang Sugbo naila na nga lugar diin nagagikanan ang pipila sa mga tang-an nga opisyal sa nasud. Ug sa iyang walay palta nga attendance didto sa hawanan sa Ubos Balay Balauranan, usa si Del Mar sa mga ligdong nga Sugboanong lider nga nahimong sumbanan didto sa Kongreso.
Usa sa nakalahi ni Del Mar sa mga politiko mao ang naangkon niyang kinaiya nga dili hingaway sa politika. Matag eleksiyon, wala gayud kita makadungog og taho sa iyang mga pagpangatake sa iyang mga kaatbang sa politika.
Gani, adunay iyang mga kaatbang sa politika kaniadto nga kusog nga moatake kaniya panahon sa pangampanya.
Apan iya lamang kining pasagdan ug nagdumili ang magbabalud pagpahit sa iyang mga kontra nga kandidato.
Hinuon, matud niya, di na kinahanglan pa nga moatake siya sa iyang mga kaatbang sa politika. Kini gumikan kay ang katawhan lamang maoy magbuot kon kinsa ang ilang botaran ug ibutang sa katungdanan.
Tuod man, sa iyang kabuotan sa panerbisyo, wala gayud makatilaw og kapildihan ang beterano nga magbabalaud. Ilabina nga nakita sa katawhang Sugboanon ang kaligdong sa iyang pagpangatungdanan.
Ang iyang panerbisyo sa mga Sugboanon mahitupngan man apan dili gayud hilabwan. Mao kana ang akong obserbasyon sa politikanhong kinabuhi ni Del Mar. Usa ako sa bulahang nakasinati kaniya isip personal nga kaila ug higala.