Saad pag-ayo sa bisan unsang sakit
Wa pay bakuna nga naggamit sa mRNA (messenger ribonucleic acid) tungod sa kalisod sa bag-ong teknolohiya ug tungod sa kakuwang og interes sa industriya sa tambal.
Unang gituki ang kahigayonan sa mRNA pagtambal sa mga sakit niadtong 1990 apan way nagtagad sa higanteng mga kompaniya.
Gawas sa gagmayng mga kompaniya nga Moderna sa Estados Unidos ug BioNTech sa Germany. Nga karon maoy labing una nga nakapahibawo sa labing madasigon nga sangpotanan sa buwag nila nga mga pagtuon sa duha ka kandidatong bakuna nga pulos naggamit sa mRNA batok sa COVID-19.
* * *
Kon molampos sa pagbadlong sa pandemiya (94% nga epektibo ang bakuna sa Moderna ug 90% nga epektibo ang bakuna sa BioNTech nga nakiglambigit sa higanteng kompaniyang Pfizer), ang mRNA makamugna og rebolusyon sa industriya sa tambal: Kay mahimong makaayo sa bisan unsang sakit.
Ang mRNA gihulagway sa mga siyentipiko nga mora og software nga mohimo sa atong lawas nga labing kasaligan nga pabrika sa mga tambal: Susama sa memory stick nga makasud ug makasugo sa lawas sa paghimo og bisan unsa nga protina aron pagbaraw sa bisan unsa nga kagaw.
* * *
Ato hinuong klarohon nga ang moderno nga mga bakuna sa Moderna ug BioNTech di pa garantisado nga makasagang sa COVID-19.
Ang nagsunod nilang mga pahibawo pulos gipaagi sa press release nga way mga dokumento ni ebidensiya nga masubli sa indepente nga mga eksperto sa nagkalainlaing kanasuran sa kalibotan.
Gawas pa, kasagaran sa nangagi nga mga bakuna mas epektibo atol sa kontrolado nga clinical trials kay sa aktuwal na unya nga pagpamakuna sa populasyon.
* * *
Apan niangkon ang mga eksperto nga ang pasiunang sangpotanan sa mga pagtuon sa mRNA sa Moderna ug BioNTech mas maayo kay sa ilang gipaabot. Kasagaran nila nagpaabot lang og 70% nga ka-epektibo, gani ang Food and Drug Administration (FDA) sa Estados Unidos nitakda sa pagtugot sa mga bakuna nga 50% nga epektibo.
Sa mosunod nga mga semana, gitakda nga mopahibawo sa pasiuna nga sangpotanan sa ilang pagtuon ang AstraZeneca ug ubang mga kompaniya nga nigamit sa naandan nga paagi sa pagmugna og bakuna, ang luya nga bersiyon sa kagaw.
Atong atangan kon sama ba kamalampuson sa makapakugang nga labok sa mRNA.
* * *
- Latest
