Nobiyembre 08, 2020: Ikatloag-duha nga Domingo sulod sa tuig
Mga Pagbasa: Kin. 6;12-16/Sal. 63/1 Tes. 4;13-18/Mt. 25;1-13
Duha ka matang sa pagpaabot. Ang pagpaabot nga passive ug ang pagpaabot nga active.
Ang passive waiting mao man ang pagpaabot sa usa ka panghitabo nga mahitabo apan wala kitay gihimo in between.
Sama pananglit sa us aka tinun-an nga samtang nagpaabot sa iyang examination wala gyuy gibuhat agig pagpangandam.
Ang active waiting nagpasabot na dunay gibuhat ang tawo in between sa panghitabo o event sa iyang kinabuhi.
Mao nga inig abot na sa gipaabot nga higayon mamahimong mas andam siya sa pag-atubang sa mga hagit sanglit naandam man siya ug wala magtanga.
Wala gyud kita masayud sa adlaw ug sa takna nga ang Dios mobalik ug mohukom kanato.
Maingon sa mga napulo ka mga dalaga diin ang lima kanila maalamon mao nga nagtagana og extra nga mga lana samtang ang uban danghag may suga apan walay extra nga lana.
Ang resulta mao nga wala na hinuon sila makatambong sa kombira sa kasal gumikan ning kalakiha. Ingon ini usab ang mahitabo kanato kun dili kita andam. Unsa may angayan natong buhaton?
1. Una, Shekinah nga sa ato pa kinahanglang anaa gyud kita kanunay sa presensiya sa Dios.
Ang pag-ampo matag adlaw bisan wala kitay panginhanglan usa naman ka dakong timailhan nga kita andam.
Sa kaulahian tinguha nato nga mamahimong mahiusa sa Dios. Ang inadlaw adlaw nga pag-ampo pagbansay naman nga anaa sa presensiya sa Dios.
2. Metanoia kun pagkakabig ngadto sa Dios. Ang pagbuntog sa bisan unsang giisip natong tawhanon dako kaayo og ikatabang aron kita makaduol sa altar sa Dios.
Gilubong ang atong daang pagkatawo aron masul-oban kita sa bag-ong pagkatawo diha ni Kristo.
3. Diakonia kun pagpangalagad. Ang tawong andam maantigong mohunahuna usab sa panginahanglan sa uban.
4. Koinonia kun katilingbanong Kinabuhi diin ang tawong andam wala lang mangandam alang sa iyang kaugalingon kondili alang usab sa uban.
Kay ang kaluwasan dili lang alang sa kaugalingon kondili usab kini katilingbanon.
Ning panahon sa dakong kalisdanan mahinungdanon kaayo ang pagpaabot sa Parousia kun sa Ikaduhang Pagbalik sa Ginoo uban ang dakong kaigmat ug kamadasigon.
Kaigmat tungod kay daghang mga tawo ang mogawas nga mga mini nga mga propeta.
Daghang mga tawo usab ang nahimong nailad gumikan sa mga pasalig sa mga mini nga propeta. Dili kita angay nga mahadlok kay matag adlaw nga pagpangandam dako naman kaayo og kahimoan aron sa Dios kita makahimamat.