Kinsa ang angayan basolon?

Apas sumpay sa akong lindog sa nakalbayng semana mahitungod sa mga aksidente nga gilambigitan sa mga bus sa Ceres Liner, magpabilin ang akong baruganan nga nakatabang sila sa paghakot sa mga pasahero kada adlaw pero gikinahanglan gyud nga desiplinahon ang mga abusadong driver.

Dunay mga kinabuhi na nga nakalas, kadtong biker sa M.C. Briones sa Mandaue nga nasaghiran sa bus ug napasok dihang natumba, samtang laing biker usab sa lungsod sa Consolacion ang namatay tungod sa susamang aksidente.

Dili mahimong magpakabuta-bungol ang tagdumala sa bus company ug mismo ang mga LGU diin magbiyahean kining mga higanteng sakyanan.

Kong naanad kining mga driver sa long distance travel sa probinsiya, lahi na intawon sa metro cities kay hilabihan ka daghan na ang mga sakyanan ug huot na kaayo ang mga karsada.

Busa gikina-hanglan nga mo-adjust kining mga driver sa bus kay gamay’ng sipyat lang kinabuhi ang mawala.

Duna may mga designated bus stop pero usahay mohunong sila sa bisan asa aron magpasakay ug magpakanaug og pasahero.

Likayan pud unta nila nga kalit og liwag sa agianan kay luoy kaayo ang mga gaymang sakyanan nga maigo kay seguro gyud nga makamugna kini og kadaut.

Samtang dili lang man seguro ang bus maoy mabasol sa aksidente nga nahitabo, apil usab ang mga tawo nga nalambigit, dili sa pagbasol sa mga nabiktima ilabi sa mga nagsakay og bisekleta, gikinahanglan gyud usab nga magmatngon dili mosabay sa mga dagkong sakyanan.

Kong mahimo mangita og agianan nga medyo safe kay kinabuhi intawon ang nakataya.

Kong tan-awon kadtong CCTV sa Mandue peligro kaayo ang gisubay sa biker nga nakigdungan sa mga dagkong sakyanan, dili siya makita sama sa ceres busa nahitabo gyud ang trahedya.

Tinuod dunay katungod ang tanan sa pag-agi sa mga karsada kong ato kining iinsister apan mag-unsa man ang katungod kong madisgrasya na.

Wala gyuy dag-anan ang mga bikers sa kamot sa mga tampalasan nga driver.

Dili sa pag-unsa, ang mga bikers abusado usab. Dili man hinuon tanan, pero base sa akong experience naa gyuy mga bikers nga morag hari sa karsada nga mo-counter flow, naay magtupad ug mag estoryahanay samtang nag-bike ug dili gyud mopadaplin bisan sirbatohan na.

Ang uban dili motuo og traffic signal, unsa exempted diay sila sa traffic rules?

Moingon ra ba dayon nga kumo mga nag-bike wala nay katungod nga moagi sa karsada.

Lagi naa gyud pero ang disgrasya dili moila og katungod busa mag-amping aron malikay sa trahedya.

Diri pud makita ang kamahinungdanon sa bike lane, kong unta consistent ang mga LGU sa paghimo niini malikayan gyud nga dunay mamatay nga mga bikers nga maligsan sa mga dagkong sakyanan.

Kong mosunod lang sa lagda sa trapiko ug ipatigbabaw ang respeto, malikayan kining ingon niini nga panghitabo.