EDITORYAL - Tabang para sa Luzon

Gibanabanang dos milyones ka tawo sa Central Luzon ang naapektahan sa super typhoon Rolly ug nagkinahanglan sila og panabang sa tanan ilabi na nga ang nasud duna pay pandemiya.

Sumala pa sa National Disaster Risk Reduction and Management Council base sa mga report sa nagkalain-laing ahensiya sa gobiyerno milyones ang danyos sa mga imprastraktura, agrikultura ug mga pinuy-anan sa mga molupyo sa 12 ka probinsya sa Luzon.

Ang Rolly misud sa Pilipinas dunay igong kasog ug gibutang kini sa Storm Warning Signal No. 5, makonsiderar na kini nga super typhoon.

Kinsa may makalimot unom ka tuig na ang nilabay kataposang naigo ang nasud og super typhoon, ang Yolanda nga mitadlas sa sentro sa nasud apil ang Sugbo.

Milyones ka tawo ang naapektahan sa maong bagyo ug sayod ang tanan sa kalisdanan nga nasinati kaniadto, way kuryente, way tubig, way kapasilongan, lisud ang pagkaon ug dunay mga nangasakit sa mga evacuation centers.

Daghang mga karsada ang di pa maagian tungod sa mga nakababag nga mga nangatumbang kahoy, nangaguba nga taytanan, ug uban pa nga nakadugang sa hagit sa mga relief efforts nga maabot ang mga biktima sa mga hilit nga lugar.

Mas lisud usab karon gumikan sa pandemiya tungod sa higpit nga pagpatuman sa mga health protocols. Dako kining hagit sa Department of Health ang pagmentinar sa socil distancing diha sa mga evacuation sites.

Ang UN Resident and Humanitarian Coordinator Gustavo Gonzalez mikompirmar motabang sa gikinahanglan sa gobiyerno sa Pilipinas sa pagtabang sa mga naapektahan. Si Pres. Duterte gikatakdang mohimo og aerial survey sa Bicolandia nga maoy unang gitugpahan sa bagyo ug maoy nakasinati og grabeng kadaut.

Dili haom nga daginuton sa mga kontra sa politika nga wa si Duterte sa Luzon atol sa pagtugpa sa bagyo.

Mas gikinahanglan nga ipalayo ang presidente sa peligro aron sa paglurang sa bagyo, dunay mangulo sa mga aksyon aron tabangan ang mga naapektahan.