Ning panahon sa dakong pandemiya nahimong daw kontrolado na pud ang atong lihok ingon nga mga tawo.
Malisud na kaayo ang ang pagsaulog sa paagi nga normal kay anaa naman ang facemask, face shield ug uban pa. Ning paagiha nahimong natak-upan ang atong dagway ning pandemiya nga coronavirus. Subo lang pud palandungon nga salingkapaw ra gyud ang gigamit natong paagi sa pag-asdang niini.
Kutob ra gyud ta sa ayuda, hinudlatay ug pahimuslanay.
Dunay mga negosyante nga nipataas sa presyo ug dunay anaa sa pangatungdanan nga nahimong nisentro lamang sa ilang kaugalingong panginahanglan imbis motabang sa uban.
Nauso na gyud ron ang power tripping kay imbis mohatag og igong pahimangno mopakapin pa gyud og panghuraw kay lagi mao ra man ang ilang madalidali. Lisud gyud diay kun mahigtan na sa nagpakaisip nga gamhanan.
Kay sila naman gyud ang magbuot kanato sa tanan natong pagahimoon.
Nahimong daw individualistic ang tawo sa pamasin nga mamahimong luwas ang kaugalingon sa further complications.
Kini ang hinungdan kun nganong daghan nato ang mahadlok mahutdan mao nga magtigom taman sa ginhawa hangtud nga sa maong pagtigum nahikalimot ta nga duna diay uban nga mas nagkinahanglan pa kay kanato. Subo ug makaluya dili ba?
Among gihimo dili pa lang dugay ang among pagbag-o sa panaad isip mga pari sa parasan sa Ginoo ingon man ang kahigayonan nga saulogon ang maong sacramental brotherhood.
Mao unta ang akong pag-ampo ug panghinaut nga kining maong panagtagbo dilli lang kutob sa maong adlaw kondili magsilbi unta kining pahigmata sa bili sa matag usa.
Mao nga magtinabangay gyud unta aron mas motunhay ang tanan diha sa pagpangalagad. Hinaut pa unta!