Gentlemen’s agreement wa natuman

Niadtong Oktubre 13, pinaagi sa selpon gipalanog-anunsiyo ni Rep. Peter Alan Cayetano ang pagtugyan sa iyang irrevocable resignation isip House Speaker sa Kongreso.

Giangkon niya ang iyang sipyat sa pagsanong sa awhag ni Pres. Rodrigo R. Duterte, kinsa mimando sa dinaliang paghuman og apod-apod sa 2021 National Budget ngadto sa tanang hingtungdang ahensiya sa gobiyerno aron dili madelatar ang mga tabang pinansiyal alang sa katawhang napektohan pag-ayo  ning padayong pagpangmangtas sa pandemiya.

Misinterpretation.

Na-misunderstood kuno niya kini nga misangpot ngadto sa kakulang nga pagsinabtanay nilang duha ni Rep. Lord Allan Velasco bahin sa ilang nasabotang speakership term-sharing deal.

Gumikan niini, nangayo siyag pasaylo sa presidente, nagpasalamat sa dakong pagsalig nga naangkon gikan sa pangulo pinaagi sa pagsangon kaniya’g mga dinagkong kaakohan sa gobiyerno ug misaad nga magpabiling motabang sa adminsitrasiyon ni Duterte.

Sa pagbuhi ni Cayetano sa pisi, nangatangtang ang mga buling nga nakasalimbong sa nagkalainlaing hunahuna sa mga kritiko. Abi nilag magpaugat gyod kini. Apan halos tanang nagsunod sa away nilang Cayetano ug Velasco nakurat, dihang ang nag-alintabong kainit sa ilang panagbingkil gipalong mismo ni Cayetano pinaagi sa iyang irrevocable resignation.

Nahitabo kini human gimontar si Velasco isip maoy bag-ong Speaker sa Ubos Balay Balauran sa 186 ka kongresista, kinsa misuporta kaniya, diin didto himoa sa Celebrity Sports Plaza, Quezon City sa miaging Oktubre 12, agig pruyba nga si Velasco maoy tag-iya sa gidaghanon nga numero ug dili si Cayetano.

Busa, pagka-Oktubre 13, giratipikahan sa mga kaubanang magbabalaod ang maong botos pabor ni Velasco didto sulod sa Kongreso aron paghimo niining usa ka opisyal ug balidong deklarasiyon, nga si Velasco na gayod ang bag-ong Speaker.

Nakalingkod man tuod si Velasco, pero wala masunod sa diyosnong paagi ang ilang term-sharing gentlemen’s agreement ni Cayetano. Kay miagi pa man kinig dakong bugno nga misangpot sa pag-inilogay ayha pa hingpit nakapuli si Velasco.

Mao kini ang matang sa kinaiya nga atong nakita nilang Cayetano ug Velasco. Magkauban ra man unta diha sa Kongreso ug nganong dili gyod magkahiusa-sinabot?

Nakalimot sila nga sila gipili sa katawhan dili alang sa ilang personal nga interest kondili alang sa interest sa atong nasod ug sa katawhan. Unta, magbag-o na sila.