Oktubre 11, 2020: Ikakawhaag-walo nga Domingo sulod sa tuig
Mga Pagbasa: Is. 25;6-10/Sal. 23/Fil. 4;12-14, 19-20/Mt. 22;1-14
Naandan natong mga Pilipino nga kun dunay mahinungdanong okasyon sa atong kinabuhi mohimo kita og pagdapit sa mga tawo nga suod kanato ug gani bisan kadtong dili kaayo nato suod. Magpa-cater dayon kita, maghikay. Gani ang uban modapit gyud og mga inilang mga tawo ug mga kadagkoan sa lungsod aron mamahimong makompleto ang talad kan-anan sa mga tawo nga gidapit alang sa maong kumbira. Ang pagsanong sa maong kumbira usa man ka paagi sa paghatag og bili kanila nag nidapit kanato. Angay matarong lamang nga sila patalinghogan agig pag-recognize usab sa ilang efforts. Insulto man usab ang dili pagpatalinghog kanila nga nagdapit.
Mao usab kini ang nahitabo sa ebanghelyo karong Dominggoha. Daghan ang gidapit apan diyotay lang pud ang nagpatalinghog ug kun dunay nagpatalinghog wala pud kapasar sa standard sa nagdapit kay lagi ang gisul-ob nga bisti dili man mao ang dress code sa kasal. Ang sinul-oban usab diay mo-matter sa gihapon ingnon tang pulonga. Mao nga gilabog siya sa gawas hangtud didto magkagot ang iyang mga ngipon.
Sa makadaghanang higayon ang atong Ginoo nagdapit kanato sa pagtambong sa iyang talad kan-anan nga mao ang Sagrada Eyukaristiya. Ang maong pagtambong usa man ka kahimanan aron mas mahimamat nato ang Dios diha sa mas suod nga paagi. Busa angayan lamang nga andamon nato ang atong kaugalingon aron sa ingon mamahimo kitang andam ug qualified gyud unta sa pagtambong. Busa angyan lamang nga sul-obon nato ang atong PPE. Kini nagpasabot og:
PAG-AMPO. Ang makanunayong pagsangpit sa Dios mao man ang makapahimo nato nga mahasulod sa presensiya sa Dios. Kun anaa kita sa iyang presensiya. The more nga maningkamot kita mahimong sama kaniya.
PAILOB. Ang dalan sa kaluwasan sigpit man nga dalan. Gani daghan og demands. Ang pagpailob diha sa panaw kinahanglanon man kaayo aron sa ingon mamahimong mas mohamtong kita diha sa pagtuo ug dili mamahimong hilaw ang tanan alang kanato.
ESPIRITU. Diin gitugotan nato ang karisma ug mga gasa sa Espiritu Santo mao ang mogiya kanato matag adlaw sa atong kinabuhi aron sa ingon matuman nato ang kabubut-ong Diosnon.
Sa atong panaw sa pagtuo, unta mamahimong mas masabtan nato ang bili sa pagsanong ug kun ang Dios na ang motawag si kinsa ba kita nga makabalibad?