Ugmang adlawa, Lunes, opisyal nga magsugod ang pinalahi ug bag-ong sistema sa edukasyon sa mga tinun-ang Pilipino. Kining distance learning maoy solusyon sa kabalaka ug kahadlok sa mga ginikanan ug sa gobiyerno nunot niining pandemiya sa COVID-19.
Si DepEd Undersecretary Diosdado San Antonio miingon nga dako iyang pagsalig nga paigo ang gihimo nilang pagpangandam niining distance learning nga gamitan og nagkalain-laing pamaagi.
Kombinasyon kini sa online classes ug printed learning modules, telebisyon ug radyo. Tungod kay gikonsiderar ang uban nga way internet, way gadgets, lagyo ang lugar nga ilang gipuy-an ug uban pa.
Apan samtang tuod miabot na og 22.5 milyones ang nagpa-enroll sa public schools, duna pay kapin 2 milyones nga nagtungha kaniadto sa public schools ang wala pa makapa-enroll.
Hinuon, magpadayon gihapon ang enrollment hangtud sa Nobiyembre sa di pa ang first periodical period. Mao nga kadtong mga ginikanan nga naglibog pa bahin aning distance learning, mas maayong ipa-enroll lang og siguro ang mga anak ug magdungan mo pagdiskubre kung unsa kini, nungka sa mabiyaan ang bata.
Sugod palang niadtong adlaw nga Huwebes, daghan ng mga publikong mga tunghaan dinhi sa Sugbo ang naghinay-hinay na pagpangapud-apod sa mga learning modules. Pipila sa mga estudyante ang excited na kaayo ug ang uban nagsugod dayon og tubag ug basa-basa sa mga nadawat nilang mga modules.
Makita gikan sa mga mata sa kabataan ang ilang kaikag ug gana nga makabalik sa pagtuon tungod sa dul-an pito ka buwan ng pagkatanggong sa balay tungod gidid-an silang makagawas. Ang mga ginikanan bisan unsa pay naabot o kinaadman, estado sa kinabuhi karon adunay dakong kaakohan para sa ilang mga anak.
Mahimo sab kining pamaagi aron mapaduol ang mga bata sa ilang mga ginikanan kay sila man gyuy mapangutan-an ug makatubag.
Total ang mga bata aduna man sab unyay kaugalingong ambisyon, posibleng dili sama sa gusto o naabot sa ilang ginikanan apan magsugod kining tanan pinaagi sa edukasyon ug dili lang kutob sa imahinasyon.