EDITORYAL - Way pagpakabana hinungdan sa kurapsyon

Daghang mga alegasyon batok sa mga local nga opisyales ilabi na sa barangay bahin sa distribusyon sa special amelioration program (SAP) sa gobiyerno alang niadtong mga kabus ug kadtong mga naapektahan sa pandemiya sa novel coronavirus disease.

Ning bag-o, 89 ka mga barangay kapitan gikan sa nagkalain-laing rehiyon sa nasud ang gisuspenso sulod sa unom ka bulan samtang adunay gihimong imbestigasyon batok kanila ug sa ilang mga kakunsabo.

Ang maong mga opisyal gipasanginlan nga nimaniobra sa distribusyon sa SAP para sa mga tawo kay dunay pabor-pabor sa mga paryente o suod nga supporters aron maapil sa mga mahatagan sa maong pundo.

Bisan kadtong dili unta angayan nga hatagan nakadawat gyud pinaagi sa mga barangay kapitan. Duna pa gyuy nangayo og mga processing fees gikan sa mga beneficiaries ayha pa sila maapil sa listahan sa mga makadawat.

Lakip sa mga nanggawas nga reklamo ang pagbuot-buot pagbahin-bahin sa mga barangay officials sa SAP aron kunohay maapud sa tanan kay lagi pipila ra ka buok ang giaprubahang benepisaryo ug daghan pang nagkinahanglan sab og tabang nga wala maaprubahi.

Ang gobiyerno nagtinguha pagtabang sa 18 milyones ka mga kabus nga pamilya sa nasud ug mao kini ang target nga matabangan sa SAP panahon sa pandemiya.

Gawas sa mga kapitan duna say ubang mga opisyal o kawani sa mga barangay nga naapil sa imbestigasyon tungod sa ilang papel sa pagmao-mao sa mga listahan sa SAP beneficiaries.

Kaning kurapsyon dulot na gyud hangtud sa barangay level. Giut-ot na og maayo ang gobiyerno nahikawan pa gyud sa benepisyo ang mga kabus.

Misanay kini nga dautang binuhatan tungod sa mga opisyales nga nagtuong dili ra sila masakpan o nagsalig sila sa ilang gahum nga dili sila ‘dutlan’ og kaso.

Usa sa mabasol nganong daghang mga kurakot nga opisyales sa gobiyerno lakip na kining mga elected officials, mao mismo ang publiko.

Pagkatinuod, misanay kining kurapsyon sa tanang level sa gobiyerno gumikan sab sa pagpakawalay-pagpakabana sa mga tawo, bisan nakita na ug nakahibalo na silang sayop ang gibuhat sige gihapon pagpakahilom.