Ayaw gihapon kumpiyansa

Atong kuhaan og leksyon ang nahitabo sa magsuon nga kanhi Dumanjug mayor Nelson Garcia ug Barili Mayor Marlon Garcia nga nagsunod lang pagkamatay tungod sa giingon kuno nga coronavirus disease.

Naluoy ko sa pamilya ni Gobernador Gwen Garcia, kay ang iyang duha ka igsuon nag-ulhos-ulhos lang intawon pagkamatay. Dili sayon kon kita maoy matumngan niini, mao nga magmatngon gyud ta.

Aw, hinuon, nakita man nako nga sagad sa mga tawo nga migawas sa ilang kabalayan ug misuroy sa downtown area, nagsul-ob gyud og face mask, ug daghan usab gani ang migamit og face shield.

Masabot hinuon nako nga daghan sa mga migamit og face shield napugos lang kay dili man pasudlon sa mga department stores kon dili ka magsul-ob niini. Apan daghan kanila, apil na gani ang mga kawani sa tindahan, nga kon tua na sa sulod, tukason nila ang face shield.

Bitaw, para nako okay na tingali ang face mask kay dili na man mangalagpot ang laway sa nagsulti, ilabi na nga gipatuman man ang physical distancing.

Apan kon nagpalit man gani kita og face shield, ato na lang gyud nga gamiton.

Ako, pagsulod nako sa department store diha sa Colon, gisul-ob gyud nako hangtud nga misakay na ko pagbalik sa akong sakyanan.

Nakahinuktok ko nga sila gani si Mayor Nelson ug Mayor Marlon nangamatay man nga kwartahan sila ug makagasto sa gikinahanglan nga mga tambal, kita pa kaha kon matakdan og Covid?

Karon hinuon, mikunhod na gyud ang mga kaso sa COVID-19 dinhi sa Dakbayan sa Sugbo, apan dili gyud kita mokumpiyansa.

* * *

Gihunahuna pag-ayo, ug nakaingon ko nga dili na tingali gyud mahanaw kining sakit nga COVID-19. Abi ninyo og ngano?

Mokalma ra ni ang COVID-19, apan kon makalimot na sab ta sa physical distancing, unya di mag-mask, motakod-takod na sab ni pagbalik.

Mao nga kon maka-afford gyud ta nga makapalit kanunay og mask, magsul-ob na lang gyud ta pirmi kon mogawas ta sa atong balay ug makighinabi sa atong mga silingan.

Makagasto man gani ta pagpalit og ilimnon kay makig-inom kita sa atong mga amigo. Makapalit man gani mo og sigarilyo, ug labaw sa tanan, makapa-load man gani mo sa inyong mga cellphones para duna mo kanunay internet connections.

Isig binantayay na lang ta kay nakasuway na kita nga ang COVID-19 pwerteng paspasa manakod, ilabi na ngadto sa mga tawo nga may daan nang sakit. Ako hinuon, wa na kaayo ko mogawas ug dia na lang ko pirmi sa akong payag.

Mag-broadcast ko sa akong programa sa radyo ug sa Facebook dia ra diri sa payag, para makalikay ta sa virus.