Dear Atty. Divine,
Ang igsuon sa akong lolo way anak. Apan duna silay katabang kaniadto nga nabuntis ug sa dihang nanganak kini girehistro man ang bata sa pangan sa igsuon sa akong lolo ug sa iyang asawa. Nahitabo kini niadto pang 1950's. Apan pag 1974, nag-file og kaso sa korte ang igsuon sa akong lolo ug ang iyang asawa aron matangtang ang ilang names sa birth certificate sa anak sa ilang katabang apan na-dismiss ang kaso kay wa man kini maasikaso human nasakit ang igsuon sa akong lolo ug namatay. Ang iyang asawa wa na sad mopadayon sa kaso kay nagtuo siya nga igo na kadtong gi execute nila nga Affidavit nga wa silay anak. Pagkamatay sa asawa, ang anak sa ilang katabang mao nay mi-inherit sa ilang mga kabtangan. Ang among pangutana kun pwede pa ba namo nga mabawi ang property isip maoy matuod nga kadugo sa igsuon sa akong lolo? Daghang salamat. —Larry
Dear Larry,
Simulation of birth ang nahitabo nga diin gipeke ang ubang entries sa Birth Certificate sa bata ilabi na gyud ang entries sa iyang parents. Usa kini ka criminal offense ug mamahimong ikiha ang nagpasiugda niini. Apan tungod kay dugay na kini nahitabo mi prescribe na ang period sa pag-file og kriminal nga kaso batok sa responsable. Apan mamahimo ninyong suwayan og file og petition sa Korte alang sa Cancellation of Entries sa iyang birth certificate ilabi na ang entries sa names sa mother og father. Inyong himuon nga supporting documents ang ilang Affidavit nga gi execute kaniadto sa igsuon sa imong lolo ug sa iyang asawa apan tungod kay di na sila maka-testify, kinahanglan mo nga mopresentar og mga testigo sa korte nga mopamatuod nga di siya matuod nilang anak. Kun ma-grant sa Court ang pag-cancel sa ilang names sa birth certificate sa anak sa ilang katabang, ang sunod ninyong buhaton mao ang pagbawi sa mga properties pinaagi sa pag-file og kaso sa korte. Thanks and God bless. —Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.