Disiplina maoy yawe

Sigun sa  Inter-Agency Task Force, napugngan na sa dakbayan sa Sugbo ang pagkuyanap sa COVID-19. Kontrolado na sa kagamhanan ang sitwasyon aron malikayan ang pagtakboy sa sakit nga mananakod.

Daghang salamat sa tabang sa nasudnong gobyerno pinaagi nilang Secretary Roy Cimatu ug ni IATF deputy chief implementer Melquiades Feliciano nga nahaw-as ang dakbayan gikan sa seryosong kahimtang.

Dili science maoy dakong hinungdan nganong nikunhod ang gidaghanon sa mga kaso sa COVID-19 dinhi sa dakbayan kun dili ang disiplina nga gipatuman sa kapolisan.

Ang estrikto nga pagpatuman sa mga lagda sa quarantine sama sa curfew, pagsul-ob og  mask, ug social distancing maoy tataw nga hinungdan sa kalampusan.

Ug hinaut masustinihan sa dakbayan sa Sugbo ang maong kalampusan taliwa niining nagpadayon pa nga hulga sa sakit.

Husto si Mayor Edgardo Labella sa iyang gisulti nga dili angayang ipasigarbo ang atong kalampusan pagpugong sa dugang pagkatap sa sakit, hinunoa magsilbi hinuon nga hagit sa matag-usa kanato nga padayonon ang pag-amping.

Husto ang mayor nga dili pa angayang mokumpiyansa tungod kay anaa pa ang sakit ug wala pay bakuna. Apan hinaut puy-an sab sa mayor ang matagpulong nga iyang litukon.

Hinaut nga mosunod ang iyang lihok sa mga pulong nga mogawas sa iyang baba ug dili lang kutob sa pasiatab.

Matud niya dili pa angayang mokumpiyansa, apan nganong nilugak ang dakbayan sa mga silot batok sa mga malapason sa lagda sa quarantine?

Ang konseho sa dakbayan sa Sugbo miamendar sa ordinansa nga nagpahamtang og bug-at nga silot sa mga malapason sa lagda sa quarantine.

Gikan sa labing taas nga P5,000 nga multa ug 30 ka adlaw nga pagkapriso ngadto nalang sa P3,000 ug samang gidugayon sa pagkabilanggo. Apan depende ni sa korte, mamahimong multa ra mahimo sab nga ang duha gyud maoy silot.

Ang kasayoran nga akong nadawat mao nga daghan ang mihangyo sa mayor nga hunongon ang pagpatuman niini. Apan ang ubang sakop sa konseho nisupak hinungdan nga isip kompromiso, ilang nahukman nga kunhoran nalang ang kantidad sa multa.

Mas labing maayong magpabilin ang taas nga multa aron magmatngon ang publiko. Bisan usa ka milyon pay multa og way intensiyon ang usa ka tawo nga molapas sa balaud dili siya angayang mahadlok.

Atong pahinumduman ang mayor nga ang kakuwang niya og dugokan maoy nakaingon nganong nisulbong ang atong mga kaso dinhi sa dakbayan sa unang mga buwan sa quarantine.

Ato nang na pruwebahan nga ang istriktong pagpatuman sa disiplina epektibo sa pagpugong sa pagkuyanap sa sakit. Busa atong padayonon ang istriktong lagda hangtud nga mahingpit ang atong kadaugan batok sa makamatay nga kagaw.

Ug aron  dili masayang ang kahago ug sakripisyo nga atong gihimo sulod sa milabay’ng kapin sa lima ka buwan. Palihog ato unang ihiklin ang paghuna-huna sa mosunod nga eleksiyon.