Duna toy usa ka inahan nga talianak. Iyang giingnan ang doktor nga kun mahimo ipatangtang ang krusipiho nga anaa duol sa iyang higdaanan.
Dili siya buot nga makita kini sa iyang anak inigkahimugso niini. Tuod man aron way gubot ang doktor misugo sa nurse nga tangtangon ang krusipiho. Gitangtang kini sa nurse.
Paglabay sa pipila ka mga takna gipahimugso ra gyud ang usa ka himsog nga batang lalaki. Ang nakaapan lang kay buta kini.
Ug tingali malipay ang inahan kay dili naman makita niini ang krusipiho sa tibuok niyang kinabuhi.
Dili pa lang dugay usa ka magbabalod nga misugyot nga kun mahimo ipatangtang ang mga krusipiho sa nagkadaiyang mga tambalanan agig pagrespeto kuno sa uban nga dili Kristiyano Katoliko.
Butang nga nakapahaling og kalagot sa pipila ka mga tawo labina kanila nga mga Katoliko kay sa kadaghan sa pwedeng himoon kini pa gyud ang gihatagan og igong pagtagad labina ning panahon sa pandemiya. Wala lang siya masayud nga ning panahona karon gikinahanglan kaayo sa mga yanong tawo ug magtutuo ang mga konkretong mga simbolo sa ilang pagtuo pinakamahinungdanon niini mao man ang Krusipiho sanglit ang maong simbolo o imahen mahinungdanong kabahin sa pagtuo dili kita pagatawgong Kristiyanos kondili kita mohangop sa krus.
Hinuon aduna koy laing panahom. Tingali ang maong paglihay timaan ba kaha nga malisud alang kanila ang pagsud-ong niini tungod kay alang kanila malisud alang nila ang paghangop mismo sa gibug-aton sa problema nga mihasmag sa atong nasud?
Nahimong miagwanta ang matag kristiyanos kay tingali bisan pa man sa kalisud kita nakaambit por lo menos sa kasakitan sa atong Ginoo tungod kanato. Wala ko moingon nga ang tawo kinahanglang mag-antos.
Apan ang kasinatian sa COVID mahimong kasinatian sa purification ingon man sanctification. Mas dunay espirituhanong paghigmata kining maong mga panghitabo karon labina ning panahona.
Mao unta kini magdala kanato og kahamtong diha sa atong panlimbasog ug dili kini maoy makapaluya nato.
Apan dunay dili buot mosud-ong sa pag-antos sa kadaghanan karon mao nga mas palabihon pa nila nga mamahimong buta na lang gyud hangtud sa hangtud. Dili ba kini tinuod.