Marta

Hulyo 29 mao ang kasaulogan sa pangilin sa higala ni Jesu-Kristo nga mao si Marta. Si Marta mao kadtong igsuon nilang Maria ug Lazaro. Si Maria kanunay ihulagway nga anaa kanunay sa tupad ni Jesus samtang si Marta kanunay’ng nagkadipodipo sa mga buluhaton. Si Lazaro ang suod nga higala ni Jesus nga namatay apan gibanhaw. Anaa sila sa Betania nagpuyo ug kining Betania matud pa kasagarang nagpuyo mga kabus lamang. Naandang tulumanon ni Jesus nga matag karon ug unya moduaw gyud siya sa panimalay sa iyang mga higala, adto siya mokaon ug adto siya mopahuway.

Sugo sa maayong pamatasan si Marta isip hostess ang naningkamot gyud mahatag lang niya ang best ngadto sa iyang bisita nga suod kaayo sa ilang kasingkasing. Tingali tungod sa kakapoy mao nga iyang gipamalihog ang atong Ginoo nga kun mahimo patabangon si Maria sa mga bulohaton sanglit kanunay lamang kining nagyampungad sa iyang tiilan ug namati sa iyang pagtulon-an.

Si Jesus nakakita man tuod sa maong concern apan iyang gipahigmata si Marta sa mas mahinungdanong butang ug kini ang paghupot sa pagtulon-ang Diosnon ug si Maria nakaangkon na niini ug dili kini mahimong bawion gikan kaniya. Wala kini magpasabot nga si Marta way tinguha nga maminaw gani may kaugalingon siyang paagi sa pagpadayag sa iyang gugma ngadto sa iyang magtutudlo.

May matudlo kini alang kanato. Ug kini naglangkob ning mosunod:

1. Ang pagbalanse sa atong lihok ug sa atong pagpahuway. Ang paglihok gikinahanglanon dili lang aron kita mabuhi kondili aron sa ingon atong mapakita ang atong pagka creative sanglit ang trabaho igo ramang mosalamin kun unsa kitang matanga sa pagkatawo. Kay matud pa ang dili motrabaho dili angayang pakan-on.

2. Ang pagpahuway wala magpasabot og passive rest hinunoa ang pagpahuway nagpasabot man og pagtigom og kusog aron kita mamahimong himsog ug abtik sa laing pakigbisog. Apan ang pinakanindot nga pahuway mao gyud ang pagpahuway diha sa presensiya sa Dios.

Mao nga kinahanglang mag-ampo kita sa kanunay. Dili paigo ang pag-ingon nga my work is my prayer. Hinunoa ang pagtungas sa bukid sa kahilom dako naman kaayo og kahimoan aron mas moduol pa kita sa Ginoo. Ug kun maduol na kita niya nan, mamahimo kitang susama kaniya.