Sa matag napu ka pasyente sa Covid-19 nga nagpatambal sa Vicente Sotto Memorial Medical Center (VSMMC) sa Dakbayan sa Sugbo, tulo ang namatay. Sa matag gatos nga nataptan sa Covid-19 nga nagpatambal sa VSMMC, 32 ang namatay.
Sa 947 ka pasyente sa Covid-19 nga naatiman sa VSMMC sukad sa pagsulbong sa pandemiya hangtod niadtong Martes, Hulyo 28, niabot og 300 (o 31.7%) ang nangamatay. Labihang taasa kon itandi sa nasudnong ihap, pinasikad sa taho sa Department of Health (DOH), nga lima ang namatay sa matag 200 ka pasyente sa Covid-19.
* * *
Mas makapakugang ang gidaghanon sa mga nangamatay sa VSMMC kon itandi sa tanang nangamatay sa Covid-19 sa tibuok Central Visayas. Sa ilang opisyal nga taho niadtong Hulyo 28, gipahibawo sa DOH nga 781 na ang nangamatay sa rehiyon. Sa ato pa, 38.4% sa mga nangamatay sa Sugbo, Bohol ug Negros Oriental ang namatay sa VSMMC.
Gitaho sab sa DOH nga hangtod niadtong Hulyo 28, niabot na og 776 nay nangamatay sa Covid-19 sa Sugbo. Sa ato pa, 39% sa mga nangamatay sa tibuok Sugbo ang namatay sud sa VSMMC.
* * *
Posibleng katin-awan sa mas daghang nangamatay sa VSMMC mao nga siyay kinadak-ang tambalanan sa Covid-19 sa tibuok rehiyon. Apan sa opisyal nga ihap sa DOH hangtod niadtong Hulyo 28, naglangkob lang og 6% ang mga kaso sa VSMMC sa 15,664 ka kaso sa Covid-19 sa Central Visayas.
Kon unom ra sa matag gatos ka pasyente sa rehiyon ang nakasud sa VSMMC, nganong 38 man sa matag gatos nga nangamatay sa rehiyon ang namatay sa VSMMC?
* * *
Bugo ko og numero. Mao nga palihog sublia ang mga numero sa ibabaw, o mas maayong motabang pagsusi sa opisyal nga mga numero nga gipagawas sa DOH matag adlaw, aron nga makatabang sa pagpatin-aw sa kalibogan.
Makatabang sa pagpasabot sa katawhan, brayt man o dili sa mga numero, kon mohatag og katin-awan sa ilang kaugalingong mga numero ang VSMMC nga ubos sa pagduma sa DOH. May sukaranan ba ang kabalaka sa mga nataptan sa kagaw nga kon modangop sila sa VSMMC kuyaw nga maapil sa tulo nga mangamatay sa matag napu ka pasyente sa Covid-19?
* * *