Niadtong nakalabayng semana dunay misumbong kanako nga usa ka gamayng nanginabuhi sa pag-deliver og mga utanon ug ubang basic needs nga naapil sa authorized person outside residence o APOR. Gikan siya nagkuha og supply gikan sa Carbon pauli sa dakbayan sa Lapu-Lapu, wala siya maproblema sa Cebu City kay gipalusot o gi-honor man ang iyang ID nga giisyu sa Department of Agriculture nga naay tatak sa IATF.
Apan pag-agi niya sa may Mandaue City Sports Complex o dapit sa BFP gipara man siya usa ka miembro sa TEAM kay coding kuno ang sakyanan. Matud sa lalaki nga duna man siyay pagtugot gikan sa DA ug exempted man siya sa coding kay basic goods man ang iyang karga. Mitubag kuno ang enforcer nga ang tawo ra ang exempted pero ang sakyanan dili pwede, nitubag ang lalaki nga unsaon niya og dala ang iyang karga lukdohon. Gikuha sa enforcer ang lisensya ug naghuwat ang lalaki nga isyuhan og citation aron iyang malukat sa TEAM Office pero wala man, siya pa ang gipangutana sa enforcer kon unsay angayan buhaton, pastilan klaro na kaayo.
Aron dili malangan ug madaut ang mga utanon og ubang produkto mikuot nalang ang lalaki og 500 isip bayad sa violation, niingon ang enforcer nga wala silay resibo, mitawag kini sa giingong inspector daw ug miabot pero wala gihapoy citation ticket. Sa laktod nga pagkasulti niiningon nalang ang lalaki nga ihatag nalang niya ang 500 sa mga enforcer bisan dili maisyuhan og resibo aron lang mauli ang iyang lisensya kay gamit kaayo sa iyang panginabuhi.
Giingnan pa siya nga atangan kong mobiyahe nga dili atol sa coding, mao pay nakakwarta mao pay nanghulga.
Gipapangutana nako sa PIO kong apil ba sa coding ang mga essential delivery, apan giingon sa city hall sa Mandaue nga exempted kini. Dili ko gusto mamasangil nga nangilkil ang mga duha ka enforcer kay basin og wala silay hanaw sa lagda.
Pero pila na kaha ka mga tawo ang ilang gipangpara ug gipangkuhaan og lisensya aron makadugo og kwarta?
Kasagaran sa akong mga kaila nga sakop sa TEAM sa Mandaue mga ligdong ug tarong man, naa lang gyud seguroy uban nga molikoy ug matintal sa kwarta. Pait kaayo nga kadtong mga tawo nga nanginabuhi niining panahon sa pandemya ang himoong gatasan sa mga badlongong nga tigpatuman sa balaod.
Matud sa reklamante nga wala niya makuha ang ngalan sa enforcer pero midyo himsog kuno ang lawas niini. Kong naay badlongon mas daghan ang ligdong busa angayan saludohan kay dili basta basta ilang trabaho nga mabuwad sa init.
Apan kadtong mga nagpagoryo goryo aron lang makapangwarta, ang Kahitas-an nalang ang bahala ninyo kay sa madugay og sa madali masakpan ra gyud mo.
Dili ra ba gusto si Mayor Jonas Cortes og ingon niini nga kawani basin sa gamayng kwarta makuha gikan sa mga gagmayng negosyante, ang panginabuhi o trabaho na gyud unya ang mawagtang busa pagtinarong mo minstras wala pa mo masakpi.