Mura'g mausab pa ang kinauwahiang bersiyon sa pamunoan ni Cebu City Mayor Edgar Labella sa transaksiyon sa giingong pagpamalit og P2.5 milyones nga tuob kits nga, dihang gikuwestiyon sa nagpakabana nga mga magbubuhis, kalit lang nahimong donasyon.
Kay mahimong maapiki silang Labella ug kaubanan sa pagtumaw sa kasayuran nga may mga lagda diayng giluwatan ang Department of Interior and Local Government (DILG) alang sa mga gobernador, mga mayor ug mga barangay kapitan sa pagdawat og mga donasyon atol sa mga katalagman ug emerhensiya.
* * *
Sa way dapigdapig, akong higala nga si Bino Guerrero ang nakautingkay sa Memorandum Circular 2008-55 sa DILG nga pinetsahan og Abril 1, 2008 ug iyang gimantala sa Facebook. Gikutlo ni Bino ang duha ka probisyon nga may labot sa pagdawat sa tuob kits:
Way donasyon atol sa mga emerhensiya gawas lang kon may pormal nga pagdawat nga luwatan ang kalihim sa Department of Health; ug
Ang panginahanglan sa pormal nga pagdawat malaktawan lang sa labing dinaliang panginahanglan, ubos sa kundisyon nga naapil sa listahan sa United Nations sa “Emergency Relief Items.”
* * *
Maong ako dayong gisusi ang taas nga listahan sa UN sa dinaliang mga hinabang, nga gibahin sa upat ka kategoriya: Telecomunications and Power Supply; Shelter, Housing and Cooking Appliances; Water Sanitation and Hygiene; ug Materials Handling.
Naapil sa listahan sa cooking appliances ang stove apan way mga gamit alang sa tuob. May nalista nga duha ka kits sa water sanitation--Portable Bacteriological Field test kit 1 ug Basic family water kit--apan, pasayloa, wa gyoy tuob kits.
* * *
Nahibaw-an sab nako nga ang memorandum sa DILG igo lang nidason sa Administrative Order 2007-0017 niadtong Mayo 28, 2007 ni Health Secretary Francisco Duque III (nga nabalik karon sa iyang karaang katungdanan). Nga naglakip sa laing lagda nga ang mga donasyon kinahanglang susihon sa Food and Drug Administration (kanhi BFAD).
Maong di ko mahibung kon nangandam nang mga abogado nga naglibot ni Labella sa pagtambag niya sa paghimo og laing pagpasabot: Di diay donasyon ang tuob kits, gibuutbuot ra diay og apud-apod sa barangay isolation centers (BICs) ug way gipananghiran sa City Hall (gawas nilang Konsehal Gerry Guardo ug ubang nangangkon og kredito).
* * *