No 'public display of affection"

Sugod niadtong Biyernes, Hulyo 10, 2020, gitugtan na sa DILG ang pag-backride sa mga motorsiklo, apan gilimitahan lamang kini ngadto sa managtiayon, kinasal man o dili, basta nag-ipon lang sa usa ka bubong. Dugang pa, adunay ibutang nga “barrier” kon ali nga nag-uwang sa driver ug sa pasahero. Gisaway ang maong kamandoan kay ngano’ng uwangon pa man nga magdulog man gani ang duha inig pangatulog. May punto sab ang pagbutang ug ali.  Sa atong kultura, wala pa kaayo mauso ang “Public Display of Affection” labi na kon mga edaran ang magbuhat sa ingon.  Hala no!

Nahutdan sa tukma’ng sangkap

Adunay pipila ka lumolupyo sa Barangay Tisa ang nakakaplag og mga dugmok nga bildo nga nasagol sa bugas nga gipanghatag kanila sa kagamhanan. Ang maong ayuda nga sinako’ng bugas giingon nga gipaagi sa barangay kinsa mi-repack usab niini ngadto sa tag-25 kilos.

Nakapahinumdum kini sa istorya diin masuk-anong mireklamo ang customer sa waiter kay ngano’ng dunay ok-ok (cockroach) ang iyang batchoy.  Nangayo’g dispensa ang waiter sa maong bulilyaso dayon pasabot sa customer, “Pasensya na Sir, ingon ang kusinero nga ok-ok lang daw iyang gisagol kay nahutdan mi karon ug butiki’.  Pagkatoytoy!

Dili mahadlok kay hadlok na daan

Gisalikway sa Department of Health (DOH) ang sugyot nga mogamit og mga “scare campaigns” aron kapugngan pa gayod ang pagkuyanap sa COVID-19. Dili na kinahanglan hadlokon ang tawo kay sayod na kita sa sangputanan kon matakdan ugaling sa coronavirus. Ang nahadlok na dili na angay hadlokon pa. Ang kagutom ug kalisod sa kahimtang karon sa katawhan maoy angay atimanon ug panagan-an sa kagamhanan.  Kay bisan gani ang wakwak o aswang, ang bata mokaon na man kon nagkutoy na ang iyang tiyan.  Saoonz!

Dili na dutlan og kauwaw

Gikataho nga ang mayor sa Seoul, Korea, nga gituohan usab nga mo-kandidato pagka-Presidente sa Korea, nag-unay paghunos sa iyang kinabuhi human mapasanginli sa kaso nga sexual harassment.  Bililhon pa gayud alang kanila ang dignidad ug kadungganan, nga kon mawala na kini, wala na’y bili usab ang tanan.  Dinhi sa Pilipinas, mora’g wala sa bokabulrayo sa nangatungdanan ang pulong nga dungog ug dignidad.  Bisan gani ang uban’g mga pulis, nga gitahasan unta nga mo-alagad ug manalipod, mao na man hinoon ang naghimo sa mga salaod batok sa katilingban.  Pag-chure mo uy!

Ugma dam-ag, naay mamumô

Giawhag sa Department of Agriculture-Central Visayas ang katawhan sa pagpananom sa ilang kaugalingon nataran sa mga utanon atol ni’ng panahon sa pandemic aron mapuslan ang panahon sa ECQ/GCQ diin ang paglaag sa katawahan gilimitahan.  Maanindot ang maong awhag bisan kon maingon ta nga kini medyo awahi na’g diyotay.  Kay matud pa bitaw sa komedya, “Mas mhaayo nhang mhananom, ngay hugma dam-ag, naa’y mamumô (Mas maayo ang mananom kay ugma damlag, naa’y mapupô)”.  Baya no!