Responsible behavior

Mao kini ang labing importanteng solusyon sa pagsanta sa pagkatap sa coronavirus sa dakbayan sa Sugbo, matud ni Baguio City Mayor Benjamin Magalong kinsa kanhi pangulo sa Criminal Investigation and Detection Group (CIDG).

Mibisita sa Cebu City si Magalong aron ipaambit ang ilang katakos ug estratihiya sa Baguio sa pag-contain sa virus.

Kini ang contact tracing nga epektibo aron matultolan ang mga dapit nga gihugpaan sa virus ug si kinsa ang mga tawo ang natakboyan niini nga makatakod pa sa ubang mga tawo.

Aron epektibong mahimo kini kinahanglang bansayon pa ang mohimo niini ug gikinahanglan nga magdugang mga team sa mga contact tracers.

Hinuon giklaro ni Magalong nga dili niya usbon ang kasamtangang setup sa syudad ug anaa na sa Cebu City kon sagopon ang pamaagi.

Gihangop hinuon ni Mayor Edgardo Labella ang pamaagi sa iyang Baguio counterpart.

Unta ang pamaagi nga gipaila ni Magalong dinhi sa syudad sa Sugbo mosaler kay epektibo man didto sa Baguio.

Nigamit ko og unta kay daghan man gyud gihapon ang gapabadlong kay ang mga pulis ra ang bantayan inig kawagtang, aw mangguho dayon.

Sa kadaghan sa mga tawo sa syudad sa Sugbo dako gyud nga hagit ang pagpahumok sa gahig mga ulo sa mga tawo.

Naa na gani ang mga sakop sa Special Action Force pero gibalewala ra man sa uban, gikinahanglan nga tutokan ang kinaiya sa mga tawo nga matod ni Mayor Magalong ang responsible behavior ang atong batonan aron makahaw-as  kita sa krisis nga atong giatubang.

Mag-unsa man ang paningkamot sa gobierno kong ang mga tawo padayon sa kagahi sa ulo wala gyuy mahimo.

Mahimo nga nisaler sa Baguio ang pamaagi ni Magalong kay dali ra pasundon ang mga tawo apan dinhi sa dakbayan sa Sugbo makapangambot nalang ko.