Dul-an sa 300 ka sakong bugas nga tag 50 kilos ang dili na mapuslan sa katawhan sa Barangay Mabolo sa dakbayan sa Sugbo tungod lay lagom ug baho nga dili gyud fit for human consumption.
Usa ka molupyo sa barangay ang na-interview nako virtually nga si Rhoniel Madrid kinsa mibutyag sa kondisyon sa bugas sa ilang barangay.
Matud niya dunay mga sinakong bugas nga nakapundo sa gym sa barangay nga wala gyud mahatag sa mga molupyo nga gipanggutom kay baho ug dili makaon. Gani nahatag na diay unta ang uban ngadto sa mga molupyo pero gipangbawi kay dili fit for human consumption.
Gikompirmar usab kini mismo sa budget officer sa barangay nga si Konsehal Eric Lepiten nga nakapundo karon sa gym ang mga sinakong bugas.
Ang naasoy’ng bugas na purchase gikan sa P3 million nga ayuda gikan sa Cebu City government niadtong unang hugna pa sa ECQ diin 80% ang gigahin alang sa pagkaon ug ang 20% sa uban nga batakang panginahanglanon.
Nakapalit man tuod og bugas ug naapod-apod ang kadaghanan pero naay nahabilin kay lagi damage nga bugas kay dili gyud makaon og tawo. Dunay mga sitio sa Mabolo ang wala gyud makadawat og bugas sukad sa unang hugna sa ECQ hangtod kuno karon.
Pangutana sa mga molupyo nganong hangtod karon wala pa man mailisi ang bugas nga baho nga pila naman ka buwan ang nakalabay.
Gitubag kini sa konsehal nga ila nang gipailisan ang bugas pero giunya-unya man hangtod nga wala na gyud moilis sa bugas.
Nagpatabang na sila sa city legal office aron magukod ang supplier pero wala pa silay update unsay nahitabo.
Niadtong Biernes naay live streaming ang mayor ug namalihog unta ko sa PIO nga i-relay ang akong pangutana kalabot sa sitwasyon sa Mabolo apan seen zone ra man akong mensahe, segurado busy sa trabaho.
Nganong gikinahanglan man nga ang city government ang mosulbad sa problema? Nganong dili man ang baranggay nga sila man ang purchase sa bugas?
Unsa man dili nila kaya ang pagpugos sa supplier nga ilisan ang bugas? Unta mahatagan kini og aksyon sa city government kay bisan og ang baranggay ra ang nakigsabot sa supplier moreflect kini imahen sa syudad.
Dili mahimo nga ibalewala kining mga isyu kay ang kinabuhi sa mga molupyo ang nakataya nga nagsalig karon sa ayuda karon sa gobierno.
Tinuod desperado na ang mga tawo nga makadawat og pagkaon pero gikinahanglan nga tratohon silang tawo ug dili hayop nga bahugan og pagkaon nga dili gani mahimong kaonon sa mga hayop. Dako gihapon ang pagsalig sa mayor nga mahatagan kini og pagtagad kay siya ang mayor nga dunay kasingkasing sa mga tawo nga giisip niyang mga anak bisan gani mga gahi og ulo ang uban dili niya pwede talikdan.
Dili lang usa ka sako kondili gatosan la ka sako nga makatambal na unta sa gutom sa mga molupyo nga nagkinahanglan kaayo og tabang karon.
Kwarta gikan sa katawhan ang gigamit sa pagpalit og bugas nga alang sa katawhan kinsa haum lang nga modawat sa maayong klase sa bugas. Angayan nga dili lang kutob sa pagpailis sa bugas kon dili angayan inbestigahon kini aron masayran unsay lintunganay niini ug mapanubag kon aduna may kalapasan ang nahimo.