Nakatutok ang tanan sa pagatubang niining novel coronavirus disease tungod sa kakusog niining motakod ug makamatay sab ilabi na sa mga edaran ug kadtong dunay mga gihambin na daang sakit.
Apan kumusta ang immunization program sa Department of Health sa mga masuso diha sa kabarangayan tunga-tunga aning mga gipatumang community quarantines.
Ang DOH dunay mandato pinaagi sa Republic Act No. 10152 “Mandatory Infants and Children Health Immunization Act of 2011 nga gipirmahan kaniadto ni kanhi Presidente Benigno Aquino III niadtong 2010.
Tumong niini nga mahatagan ang mga masuso og proteksyon gikan sa nagkalain-laing mga sakit nga hinungdan sa pagkabakol o kamatayon apan pinaagi sa bakuna mapugngan kini.
Kining maong mga sakit naglakip sa polio, tipdas, diphtheria pertussis, tuberculosis, tetanus ug Hepatitis. Ang mga bata kinahanglang mabakunahan batok niini sa dili pa sila mag-usa ka tuig.
Sa website sa DOH, ang World Health Organization mibanabana nga 14 porsiyento o 1.4 milyon ka mga bata nga wala pay 5-anyos ang nangamatay niadtong tuig 2002 sa tibuok kalibotan.
Nangamatay sila sa nahisgutang mga sakit nga mapugngan ra unta pinaagi sa bakuna.
Ang COVID-19 nakahatag og kahadlok sa katawhan mao nga adunay pipila ka mga inahan ang nagduhaduha sa pag-adto sa mga barangay health centers aron pabakunahan ang ilang mga anak.
Apan bisan pa niini, kinahanglang dili pasagdan sa mga inahan, mga health workers sa barangay ang mga masusong wala pay bakuna.
Ang COVID-19 wala pa say bakuna kontra niini ug kuyaw kaayo ang kapaspas ni makatakod sa uban.
Apan bisan wa pay bakuna, adunay mga basic protocols lang nga kinahanglang sundon sama sa social distancing, pagsuot gyud og facemask, paghugas ug manabon sa mga kamot matag karon ug unya ug ang pagpundo sa balay.
Ang mga masuso mabutang sa peligro kun matakboyan og COVID-19 apan mas peligroso kaayo kun dili sila mabakunahan. Kinahanglan lang nga magamping sa pagpabakuna pinaagi sa pagsunod sa protocols.