Hinaut mahimong mas matinud-anon
Ang kalibog nga namugna sa sayop nga balita nga gipaubos ang tibuok Central Visayas sa enhanced community quarantine (ECQ) maoy sangpotanan sa bag-ong paagi sa pagsibya sa mga pahibawo sa mga buhatan sa gobyerno ug sa paghipos og kasayoran sa mga sakop sa media taliwa sa kalibotanong hulga sa COVID-19.
Nagsugod ang sayop sa way klaro nga pahibawo ni Undersecretary Maria Rosario Vergeire sa Department of Health (DOH). Kay online ra man ang press briefing, wa dayon kapangayo og katin-awan ang mga sakop sa media maong usa nila nalingla ug nahinayak.
* * *
Sa kadaghan na sa sipyat sa DOH sa COVID-19, mas mabinantayon na unta si Vergeire. Apan ang pagsumpay sa usa ka ginhawa sa Sugbo ug kadaghan sa kaso sa Region 7 ug ECQ nakapalibog ni bisan kinsa nga naminaw niya.
Gipahibawo niya nga gipaubos sa ECQ ang “lugar” sa way pagtino kon ang “Cebu” o “Region 7” ba ang iyang gipasabot. Bisan unsa pa, sayop siya kay Cebu City ra man ang gipahimutang sa ECQ. Wa hinuon siya mag-inusara kon nagtuo nga ang “Cebu” ug “Cebu City” mao ra.
* * *
Di hinuon makalusot ang reporter sa iyang pataka. Ang pagtingkag sa iyang dunggan sa kahigayonan nga ECQ na ang tibuok Central Visayas gidasonan unta sa paghipos og dugang detalye gikan sa uban pang mga tinubdan.
Kon naglisod siya sa pagpangayo og dugang katin-awan ni Vergeire mahimo ra gyod untang manawag ni Cabinet Secretary Karlo Nograles nga maoy labing suhito kon may bag-o bang resolusyon ang Inter-Agency Task Force (IATF) mahitungod sa Sugbo ug Central Visayas.
* * *
Di mabasol nga napugwat ang mga molupyo sa Sugbo, Bohol, Negros Oriental ug Siquijor sa sayop nga balita. Kay ang ECQ nagkahulogan sa pagpanira pagbalik sa mga negosyo, pagkawagtang na sab sa mga trabaho, pagpahunong sa mga sakyanang pamasahero, pagkatanggong pagbalik sa kabalayan ug dugang kalisdanan. Hinaot nga gawas nga mas mabinantayon:
Mahimong mas matinud-anon ang mga opisyal sa gobyerno sa paghatag sa labing mahinungdanong kasayuran; ug
Mahimong mas determinado ang mga sakop sa media sa pagsusi unsa katinuod ang mga pahibawo inay nga igo lang moyangu-yango sa bisan unsang isulti sa ilang mga tinubdan sa kasayuran.
* * *
- Latest
