Way giila ang novel coronavirus disease basta mataptan unya hinay na ang lawas tungod sa daang gihambin nga mga sakit maoy grabe ang risgo sumala pa sa mga doktor base sa ilang mga pasyenteng nakuptan.
Sud lang niining semanaha, daghang mga inilang mga tawo sa sosyodad sa Pilipinas ang nangamatay tungod sa komplikasyon sa COVID-19 nga maoy naka-trigger sa paghinay og samot sa ilang resistensya batok sa daan na nilang gidala-dalang sakit.
Sa Cebu City kagahapong adlawa, Hunyo 19, napulo ka mga tawo ang nangamatay samtang 122 ang nadugang sa mga kompirmadong nataptan. Niadtong nakalabay nga Hunyo 18, ang siyudad nakatala sab og 201 ka bag-ong kaso. Dili lang ang Cebu City ang nakasinati og pagdaghan sa mga kaso dinhi sa Sugbo kondili hasta sab ang mga kalungsoran sa probinsya. Nagpasabot lang kini nga padayon ang pagkuyanap sa virus diha sa mga komunidad.
Daghan ang nangita og kapasanginlan ug kinsay gustong basulon sa nahitabo. Ang uban sa social media midangop diin sagol-sagol sab ang motibo, dunay uban mipasangil og kurapsyon, politika ug uban pa.
Apan subo lang sab nga duna nay pipila ang dili na gustong motuo sa mga kaugmaran sa sitwasyon sa COVID-19 karon kay nagtuo silang tinuyo nga padugayon kining krisis.
Samtang wala tuod silay mapakitang ebidensya o pagmatuod sa ilang pagduda, dili sila mabasol nga makaingon niini tungod sa pila ka bulang kalisdanan nga ilang nasinati sa mga lockdowns ug quarantine.
Apan bisan unsa pa ka estrikto ang mga mayor, ang gobernador, ang kapolisan ug barangay officials sa pagpatuman sa ECQ protocols kun ang katawhan dili sab mokooperar sa simpleng kamandoan sa pagsuot og facemask, pagpuyo sa balay ug social distancing, mabalewala kini.
Sa pikas bahin, kinahanglang tinud-on sa kapolisan ang paghigpit sa pagpatuman sa protocols, dili lang diha sa kadalanan kondili diha sa mga sudlonong mga bahin sa mga barangay diin sagad magtapok-tapok ang mga tawo.