EDITORYAL - Maayong pamatasan

Sa pagpaubos sa Cebu gikan sa enhanced community quarantine(ECQ) ngadto nalang sa general community quarantine daghan ang nipakita og pagduda ug kabalaka nga mosaka gyud ang gidaghanon sa mga mataptan sa sakit nga coronavirus disease.

Karong adlawa mao ang pagkapupos sa kinse ka adlaw nga GCQ ug daghan ang nag-atang nga pakubsan nasad kini ngadto sa modified GCQ diin mas daghan nang mga tawo ang makagawas sa panimalay ug ang mga establisamento madugangan na ang gidaghanon sa mga trabahanteng patrabahuon.

Sa pag-GCQ naobserbahan ang pagsaka gyud sa gidaghanon sa nataptan. Matud pa sa mga tinugyanan sa panglawas resulta kini sa mas paspas ng pagpagawas sa mga resulta sa swap testings nga gihimo.

Kun pananglitan pakubsan ngadto sa MGCQ ang Sugbo unya ang mga tawo magpasagad sa ilang kaugalingon, mas modaghan pa gyud kining mga kaso sa COVID19.

Diha sa social media daghang mga posts sa mga netizens nga nagpadayag sa ilang kabalaka samtang hilom lang kadtong mga uyon niini ilabi na kadtong mga naglisod na tungod kay wa nay trabaho.

Ang mga local government units ug mga magpapatigayon mas nabalaka sa ekonomiya kay sayod silang dili mahimong magsalig nalang ang tanan sa gobiyerno.

Ang gobiyerno maoy magpakaon ug mopatambal sa mga tawo hangtud sa hangtud? Ug sa samang higayon ang gobiyerno usab ang magbayad sa gastos sa mga pasilidad para sa mga matakboyan sa COVID-19?

Hangyo lang sa gobiyerno sa tanan nga mag-amping sa tanang oras. Ang virus dili makitang kaaway apan mahimong malikayan pinaagi sa pagsunod sa mga gipatumang protokol sa Inter Agency Task Force on the Management of Emerging Infectious Disease.

Hinumdoman unta sa tanan nga kung taas mo og resistensiya batok niining maong sakit, wa kini magpasabot nga di makatakod sa mga masakiton o edarang miyembro sa pamilya.

Ang pagsuot og facemask sa tanang oras depensa aron di matakboyan o  aron di  makatakod sa uban. Karong panahona maisip na kining usa ka maayong pamatasan.