EDITORYAL - Kalamidad ug COVID19

Nadugangan ang kalbaryo sa mga tawo sa nanglabay nga mga adlaw gumikan sa bagyong Butchoy nga migawas sa PAR kagahapong adlawa.

Daghang lugar sa Luzon ang nakasinati og grabeng pagbaha ug kusog nga hangin ug pag-ulan nga nipahunong sa panginabuhian nga hinayhinay pa lamang nibangon gikan sa COVID-19.

Ang labing grabeng naapektahan mao ang mga locally stranded individuals (LSI) nga nangatanggong sa mga tugpahanan ug mga pantalan ilabi na didto sa Luzon. Ang mga ingon niini nga katalagman sama sa bagyo mapangandaman sa normal nga mga sitwasyon, apan tungod niining COVID19 daghan sa mga lokal nga kagamhanan nga giagian sa bagyo ang nakuratan.

Lisud na daan ang pagpangandam sa normal nga panahon ug kining maong bagyo nagpahinumdom sa gobiyerno ug sa katawhan nga mangandam sa mas grabe pang moabot nga mugna sa kinaiyahan karong nagsugod na ang ting-uwan.

Maayo nalang nga dili dinhi sa Sugbo nasentro ang bagyo. Ang Sugbo ubos pa gihapon sa general community quarantine, ug bisan duna nay pipila ka establisamentong nakabalik na og pangabli, wala pa kini hingpit nga nakabangon.

Mabatyagan pa hangtud karon ang epekto sa COVID-19, sa presyo pa daan sa mga palaliton sama sa isda, prutas ug mga utanon sa Carbon Public Market nga grabe ang pagsaka, senyales kini nga wala pa makarekober ang Sugbo.

Busa, kay ting-uwan naman, ug anaa pa gihapon ang hulga sa COVID-19, doblehon o triplihon pa unta sa mga LGUs ang pagpanagana sa kalamidad nga maabot.

Dili ikalimod nga tungod sa COVID-19 hurot-hurot na sab ang mga panudlanan sa mga LGUs, mas labaw pa sa bulsa sa mga tawo nga halap pang nanikay-sikay kay kadaghanan nawagtangan og panginabuhian.

Kining sitwasyong mugna sa COVID-19 ug ang problemang dala sa mga umaabot nga bagyo angay panaganahan sa gobiyerno ug sa katawhan aron bisan magkinaunsa dili dako o grabe ang epekto sa kinabuhi sa tanan.