Maayong pagkabaraw sa lakang sa kagamhanang probinsiyal sa Sugbo nga magtugot sa mga molupyo pag-backride sa motorsiklo niining panahon nga nagnihit ang pangpublikong transportasyon sulod sa lalawigan gumikan sa social distancing.
Mismong si Presidente Rodrigo Duterte ang mipakgang sa executive order nga gipagawas ni Gobernador Gwendolyn Garcia sa niaging semana nga nagtugot sa mga molupyo pag-backride sa motorsiklo dinhi sa probinsiya taliwala sa kakulang sa public transport.
Rason ni Duterte nga dili mahimo nga exempted ang lalawigan sa Sugbo sa guidelines sa Inter-Agency Task Force for the Management of Emerging Infectious Diseases nga nagdili sa pag-backride sa motorsiklo samtang anaa pa ang nasud ubos sa quarantine tungod sa coronavirus.
Insakto usab ang baroganan sa presidente. Kay kun tugotan sa national government ang probinsiya sa Sugbo nga maka-backride ang mga molupyo niini sa motorsiklo, klaro nga dili kini makiangayon ngadto sa ubang lalawigan sa nasud.
Hinuon, dili usab nato mabasol si Gobernador Garcia sa iyang pagluwat sa maong executive order pagtugot sa motorcycle backriding sa lalawigan. Kini tungod kay iyang nakita ang dakong panginahanglan sa transportasyon sa Sugbo taliwala sa lagda sa social distancing.
Apan tungod lagi sa guidelines sa task force taliwala niining atong pagpakigkumbati sa COVID-19, walay nahimo si Garcia ug ubang opisyales sa Kapitolyo. Kay basin unya kun ang maong executive order moresulta na hinuon sa ilang suspensiyon. Gani gipahimangnoan na si Garcia ni Department of Interior and Local Government Undersecretary Epimaco Densing III nga dili ipursige ang maong executive order kay basin og makasohan kini og kriminal ug administratiba.
Kasabot kita sa simpatiya sa atong mga opisyal sa lalawigan ngadto sa mga molupyo nga maoy nag-antos karon sa ka kulang sa kasakyan gumikan sa padayong quarantine tibuok nasud tungod sa coronavirus disease.
Apan, sa laing bahin, salikwaot nga hunahunaon nga magpakabuta-bungol na lamang usab ang nasyonal nga kagamhanan sa maong executive order sa Kapitolyo bisan pa man kun sukwahi kini sa guidelines nga gipanday sa task force.