Daghang engrandeng kasal nga na-schedule sa tungatungang bahin sa Marso 2020 hangtod karon ang napugngan tungod sa COVID-19.
Ug kon ipadayon na kini inig libkas sa Enhanced Community Quarantine (ECQ) nga pulihag Modified ECQ, diin gitugotan na ang simbahan paghimog kasal, ubay-ubay gyong dinagkong kuwartang gideposito sa mga kaslonon ngadto sa wedding coordinators, hotel ug reception venues ang bawion.
Kini tungod kay ubos sa MECQ o GCQ gidili ang mass social gatherings.
Kutob lang sa napulo ka partisipante ang makatambong sa kasal: ang mga kaslonon, ginikanan, igsuon, ninang ug ninong.
Paagi sa Ginoo aron masabwag ang iyang mensahe, nga sa mga maghigugmaayng nagkasabot, ang importante dili ang dakong hikay, kondili, ang Sakramento sa Kasal.
Dinhay gikasal, diin si Fr. Ciano Ubod ang mohiusa, sa wala pa magsugod ang seremonyas, gitagsatagsa niya pagpangutana ang kaslonon kon nahigugma ba gyod tinuoray ang matag usa?
Matud niya, ikaw babaye, ingkasog human sa inyong kaminyoon, mangabit imong bana, mahigugma pa ba gihapon ka niya?
Di ba nimo siya biyaan?
Ikaw lalaki, kon minyo na mo, unya imong asawa nakasala nimo, higugmaon ug panggaon mo ba gihapon siya?
Kay kon moingon mong dili, aw, dili na lang tamo kaslon!” Komedya sa pari nga may lawom kaayong kahulogan.
Bitaw. Ang kaminyoon, segun sa akong paghubad sa maong pagsukod ni Fr. Ciano, usa ka krus nga atong gipingayo sa Ginoo.
Kita ang mipili sa maong krus. Kita ang mipili kinsay atong pangasaw-on o pamanhon, diin oras nga hiusahon ang paresan atubangan sa altar sa Diyos, walay si bisan kinsa ang makabulag niini.
Sa kaminyoon, naangkon nato ang krus (bana/asawa) nga atong gipangayo gikan Niya. Busa, angay natong ampingan, mahalon ug higugmaon bisan sa mga higayon nga atong asawa/bana makasala.
Sanglit, sa giingon ko na, kita maoy nangayo niining krusa.
Hinumdomi, miingon Siya: “Ang krus nga Akong ihatag ninyo gaan.
Apan sa higayon nga mabug-atan kamo pag-ayo sa krus nga inyong gipas-an, umari kamo Kanako kay Ako tamong papahulayon.”
Nga sa ato pa, kon dili nato isalikway ang pagpas-an sa krus sukad sa sinugdanan nga gihatag kini nato sa Ginoo hangtod nga moabot kita didto sa linya sa atong kinutoban, mahalangit gyod diay kita.