EDITORYAL - Mag-amping gyud kanunay

Mga barangay nga wa gyud sukad makatala og kompirmadong kaso sa novel coronavirus disease (COVID)-19 dili pa makasigurong wa gyud silay residenteng wala matapti sa maong virus.

Kini base sa gipagawas nga pamahayag sa Office of the Presidential Assistant in the Visayas base sa nakita sa DOH-RESU-7 niadtong Biyernes sa resulta sa gihimong prevalence testing, o sa laktod ang rapid community test sa nakalabay nga duh aka semana sa tulo ka mga dagkong siyudad sa Sugbo, ang Cebu City, Mandaue City ug Lapu-Lapu City.

Nakita didto nga dunay mga barangay nga walay kaso sa COVID-19 ang adunay mga residenteng napaubos sa rapid test nga dunay mga impeksyon.

Impeksyon nga may pagkaparehas sa sintomas sa COVID-19 sama sa grabeng trangkaso, sip-on , ubo ug hilanat nga makatakod sab sa uban.

Ang mga nakitaan og impeksyon mao lang kadtong nagpaubos sa rapid test, pila ra man to sila ka buok kun itandi sa tibuok populasyon sa ilang barangay? Nagpasabot nga naa gyuy dakong posibilidad nga dunay mga molupyo nga positibo apan way gipamati sa lawas o asymptomatic.

Karong adlaw nga Lunes, Hunyo 1 paubsan na gikan sa enhanced community quarantine ngadto sa general community quarantine (GCQ) ang Cebu City human napresentar ang assessment sa rapid test ug nitugot ang Inter-Agency Task Force on Emerging Infectious Disease sa apelar ni Cebu City Mayor Edgardo Labella.

Dili na kinahanglang libogon sa mga tawo ang ilang hunahuna kung modified ECQ o GCQ ba. Basta ang importante dili molugak sa pag-amping sa kaugalingon ilabi na kadtong mobalik na sa panarbaho.

Angay hinumdoman sa tanan, bisan og mag ECQ, MECQ, GCQ o MGCQ ang usa ka lugar, ang tawo maoy takboyan sa novel coronavirus. Nagpasabot kini nga ang tawo maoy kinahanglang mag-amping sa tanang oras.

Ang gobiyerno naninguha nga makontrol ang pagkatap niini ug dako og papel ang katawhan aron kini molampos. Bisan unsang pagpaluag sa kahigpit sa protocols, angay kining ipasalamat apan dili usikan tungod sa pagkawalay disiplina ug kuwang sa pagamping.