Ang mga kabus seguradong mabiyaan

“Maski ako nga maestra, naglibog kung unsaon nako ni pag-estokada ron tuiga! I can't even access thru all the apps nor join the webinars because of internet connection issues”

Mao kini ang tipik sa mensahe gikan sa usa ka magtutudlo kinsa nakasinati karon og kalisdanan unsaon sa pagpahaum sa sistema nga ipatuman niining gitawag nga new normal.

Subay usab kini sa pagpadayon sa pagbukas sa klase karong Agusto 24 bisan pa man kon nabutang sa walay kasegurohan ang tanan. Sa tinuod lang, ang mga magtutudlo ingon usab niini ang kalbaryo nga ilang pas-anon. Kinsa man ang mga maestro ug maestra nga wala maglisod sa pagsagop sa mga modalities nga ipatuman sa DepEd?

Dili baya lalim sa side mga educators kay sila gyud dayon ang basolon sa mga ginikanan kon dunay mga lapses nga segurado gyud mahitabo kay unang higayon pa kini nga atong magamit. Kong ang mga magtutudlo nibati og ingon niini nga medyo anaa silay kaya, unsa na kaha ang mga kabus nga tinun-an?

Nindot hinuktokan ang panahom sa akong higala nga maestra (dili lang nako siya nganlan kay sakop ra ba siya sa DepEd) nga nahingawa siya kon pila kaha ka mga tinon-an ang makakab-ot sa learning goals karong tuiga tungod sa kapobrehon.

Gitumbok niya ang minilyon ka mga estudyante nga nahisakop sa poorest of the poor nga wala gani kuryente, walay bisan unsa nga kagamitan nga makasabay sa bag-ong sistema karon. Gipanghambog sa atong gobiyerno nga walay mabiyaan o no one is left behind apan klaro kaayo ang mga kabus ang mabilin samtang ang uban mag una kay naa man silay ikasarang.

Seguro alang sa uban nga haruhay og kahimtang sayon ra nga mosagop sa kabag-ohan apan sa mga kabus kining tanan kutob lang sa damgo nga dili mahatagan og katumanan.

Ang mag-antos dili lang ang mga tinun-an ug mga ginikanan kondili ang mga magtutudlo usab kay sila ang nagsakrispisyo aron maumol ang kinaadman sa mga bata.

Kon dunay mga tinun-an nga mobaklay og taas nga kilometro, naa usay mga magtutudlo nga mas labaw pa ang sakripisyo naa ganiy motabok sa mga sapa motungas sa bukid aron mapaambit ang kaalam.

Sa kataposan, ang mga ginikanan maoy magbuot sa kaluwasan sa ilang mga anak, dili man seguro krimen nga dili paeskwelahon ang anak kay gusto lang kining panalipdan.