Mopa-eskwela mo?

Para kanako, dili gyud maayo nga dalidalion ang pag-abli sa klase ug gamiton ang mga eskwelahan nga gipapuy-an karon sa mga napositibo sa coronavirus disease, kon padayon pa ang pagkuyanap sa COVID-19.

Ambot og mahimutang ba kaha ang mga ginikanan nga maghunahuna sa ilang mga anak nga tua sa mga eskwelahan nga gipanggamit isip “barangay isolation centers” ug gipuy-an sa mga napositibo sa coronavirus.

Samtang dili tanang tunghaan ang gipanggamit nga isolation centers sa mga COVID-19 positives, apan sigurado gyud nga masakripisyo ang kabataan kon ipadayon ang klase karong Agosto 24.

Ngano man? Sagad sa mga tinun-an nagsalig ra sa mga public transport nga ilang kasakyan paingon sa tunghaan ug pauli sa ilang kabalayan. Tungod sa ipatuman nga social distancing, tingali daghan ang mga tinun-an nga ma-late pag-abot sa tunghaan ug magabhian na sa pagpauli nila sa ilang panimalay.

Inig-abot sa ilang balay, ang tinun-an magtrabaho pa sa ilang “homeworks” nga gihatag sa mga magtutudlo ug tungang gabii na makatulog, unya mosayo pa sa pagmata inig kabuntag.

Kon mag-social distancing man sab sa tunghaan, pipila ra ka tinun-an ang makatungha. Imposible sab kaayo nga mapatuman ang “online schooling” kay daghan sa mga tinun-an way mga smart phones, way mga internet connections, apil na gani ang mga magtutudlo.

Unsaon man kon ang usa ka tinun-an dili makatuman sa iyang obligasyon kay nahutdan og “load” para sa internet? Pagka dakong hasol niini.

* * *                       

Ang laing isyu mao nga alkanse kuno ang gobiyerno kon nagsige kini og sweldo sa mga magtutudlo unya wa sila magamit. Aw, kining mao nga isyu angay’ng pangitaan og paagi sa kadagkoan sa Department of Education.

Unya, kabahin sa hulga nga manirado ang ubang pribadong tunghaan kon dili makabukas ang klase karong Agosto 24, sila ang magbuot kabahin sa pagdumala sa ilang tunghaan.

Daghang mga ginikanan nga akong nahinabi ug sila mipadayag gyud og kabalaka mao nga naglibog sila kon paeskwelahon ba nila, o dili ang ilang mga anak pananglit mag-abli man gyud ang klase.

Ang pipila ka kadagkoan sa DepEd miingon ang mga bata kuno makalimot sa ilang leksyon sa miaging school-year kon way klase karong tuiga. Kon iuswag man gyud ang klase, ang mga magtutudlo mohimo usa og “review” sa mga natudlo sa miaging tuig, usa sila mopadayon sa naandan nga leksyon.

Buyno, kay layo pa man sab ang Agosto 24, basin og mahanaw na ang coronavirus sa dili pa moabot ang maong adlaw, ug nga hingpit na nga “ma-disinfect” ang mga tunghaan nga gipanggamit isip mga isolation centers.